Belê, ez ji aliyê nesebê ve û ji aliyê jiyanê ve ji tebeqeya ewamê me. Û ez ji aliyê meşrebê ve û ji aliyê fikrê ve ji wan kesan im yên mesleka wekheviya huqûqê qebûl kirine. Û ji aliyê şefqetê ve û bi raza dadweriya ku ji Îslamiyetê tê ji berê û pêşde ez ji wan kesan im ên di dijberiya îstîbdad û zordariya çîna xewasê ya jê re burjuva tê gotin de dixebitin. Ji ber wê, ez bi hemû hêza xwe ve di lehê dadweriya tam de me û dijberî stem û zordarî û pêkutî û îstîbdadê de me. Bes fitreta însên û raza hîkmetê, dijberî qanûna wekheviya mutleq de ye. Çûnkî, Fatirê Hekîm ji bo ku kemal û qudreta xwe ya tam nîşan bide, wek çawa ji tiştekî hindik gelek mehsûlatî dide wergirtin û di rûpelekê de gelek kitêban dide nivîsandin û bi tiştekî gelek wezîfeyan dide kirin, (wisa jî) bi cinsê însên, wezîfeya hezaran cinsan dide dîtin. Va ye ji ber vê raza mezin e ku Cenabê Heq cinsê însên di fitreteke wisa de afirandiye ku bi hezaran cinsan simbil bide û qasî hezaran cinsên dî yên heywanatî tebeqeyan nîşan bide. Wek heywanên dî tixûb nehatiye danîn ber hêza wan û letîfeyên wan û hestên wan; ew serbest kirine û îstî‘dadeke ku di meqamên bêhed de bigerin, daye wan, ji ber wê çendê ku ew bixwe cinsek in, dikevin hukmê hezaran cinsan de, lewma bûye xelîfeyê erdê û bûye encama gerdûnê û ketiye şûna sultanê giyaneweran de.    

   Va ye havênê herî girîng ê cûrbecûriya cinsê însên û zenbereka wî, fezîleta bi îmana heqîqî ya bi peşbaziyê hatî bidestxistin e. Rakirina fezîletê; bi guherandina mahiyeta însên û bi tefandina aqilî û bi kuştina qelbî û bi mehfkirina giyanî dibe. Belê, divîbû ku ev peyva hanê ya kamil li nav çavên vê sedsala hanê ya xedar hatibana xistin ku ev sedsal di bin perdeya serbestiyê de zordariyeke dijwar dihewîne, lê mixabin ev peyv bi xeletî û neheqî li rûyê vî camêrê hanê yê hêja hatiye xistin:

   Ma mimkun e bi zulm û bêdadiyê, îmhakirina hurriyet   

   Ger muqtedîr î, bixebite, îdrakê rake ji însaniyet! ¹

   Ji bo ku li rûyê vê sedsalê bikeve, ez jî ji dêl vê gotinê dibêjim ku;

   Ma mimkun e bi zulm û bêdadiyê, îmhakirina heqîqet   

   Ger muqtedîr î, bixebite, qelbî rake ji însaniyet!

   Yan jî,

   Ma mimkun e bi zulm û bêdadiyê, îmhakirina fezîlet   

   Ger muqtedîr î, bixebite, wîjdan rake ji însaniyet!