Madem di îxlasê de wekî wan taybetiyên navborî gelek nûr û gelek hêz hene û madem di vê dema dijwar de û di hember dijminên hêwilnak de û di hember zordestiyên dijwar de û di nav bid‘e û averêtiyên êrîşkar de em gelek hindik û hejar û xizan û bêhêz in; digel wê çendê wezîfeyeke îmanê û xizmeteke Qur’anê ya gelek giran û mezin û giştî û pîroz ji aliyê îhsana îlahî ve li milê me hatiye barkirin. Bi qet‘î ji her kesî bêhtir em mejbûr û mukelefê wê çendê ne ku bi hemû hêza xwe ve em îxlasê bi dest bixin. Û em gelek û gelek hewceyî wê çendê ne ku em raza îxlasê di xwe de bi cî bikin. Yan na, hem hinek ew xizmeta pîrozwer a ku heta niha me bi dest xistî wê winda bibe, wê dewam neke; hem jî emê gelek zêde berpirsiyar bibin. Wê demê emê bigihîjin nehya îlahî ya gelek gefxwer a di ayeta.
وَلاَ تَشْتَرُوا بِآيَاتِى ثَمَنًا قَلِيلا
ê de û emê li ser zerera bextewariya ebedî, ji bo xatirê hin hisiyatên suflî û hin faydeyên cuz’î yên bêmane, nepêwist, zirardar, kedernak, xodfiroşane, seqîl û riyakarane îxlasê ji dest xwe derxin û emê hem êrîşî huqûqê hemû birayên xwe yên ku di vê xizmeta Qur’anê de ne bikin hem jî emê bêhurmetiyê ji pîrozweriya heqîqetên îmanê re bikin.
Birano! Heçî karên xêrê yên girîng û mezin in gelek astengiyên wê yên zirardar hene. Şeytan, bi xizmetkarên wê xizmetê re gelek têdikoşin. Di hember van asteng û şeytanan de divê em xwe bispêrin hêza îxlasê. Mirov çawa xwe ji mar û dûpişkan diparêze hûn wisa xwe ji wan sebebên ku îxlasê dişkînin biparêzin. Wek Hezretî Yûsif (e.) gotî
اِنَّ النَّفْسَ َلاَمَّارَةٌ بِالسُّوءِ اِلاَّ مَا رَحِمَ رَبِّى
mirov bi nefsa emarê ewle nabe. Bila enaniyet û nefsa emarê we nexapêne. Ji bo bidestxistina îxlasê û parastina wê û defi‘kirina astengiyên wê divê ev distûrên bên bibin rêberê we.
DISTÛRA WE YA YEKEMÎN: Di emelê we de divê razîbûna Xwedê hebe.
Eger ew razî be, dinya tev bixeyide xem nake. Eger ew qebûl bike, dinya tev red bike bandora wê nîne. Piştî ku ew razî bû û qebûl kir, eger ew bixwaze û hîkmeta wî jî pêwist bibîne, hûn nexwazin jî Ewê bi xelkê bide qebûlkirin û wê wan razî bike. Ji ber hindê, di vê xizmetê de pêwist e mebesta esasî rasterast razîbûna Cenabê Heq be.
