Nimûneyo Çarin: Îbnê Wehb ke îmamêko pîl o, xebere dano ke Muawwîz Îbnê Efra ke çarês şehîdanê Xezweyê Bedrî ra yew o, gama ke o û Ebû Cehîl danê yewbînan ro, Ebû Cehîlê leînî, yew destê ey qehremanî birnayo. Ey zî pê destê xoyê bînî, destê xo hewanayo û ameyo hetê Resûlê Ekrem ‘eleyhîsselatu wesselamî. Resûlê Ekrem ‘eleyhîsselatu wesselamî, destê ey cayê ey de rona û aliya xo tira sawite. Cade şîfa dî, hewna şi herb, heta şehîd bi herb kerd.1 Hem hewna Îmamê Celîl Îbnê Wehb xebere dano ke ey xezweyî de, şimşêrêk sereyê kiftê Hubeyb Îbnê Yesafî ro pirodiyabi ke seke felqeyêk ey tira biabiriyo, birînêka ecêb tede abîbî. Resûlê Ekrem ‘eleyhîsselatu wesselamî polê ey pê destê xo kiftê ey ra dusnayo, nefesê xo dayo ser, şîfa diyo.2 Ha yo nê her di hedîseyî, her çiqas ehedî yê û xeberê wahîd ê; labelê gama îmamêk sey Îbnê Wehb teshîh bikero û xezweyêko sey Xezweyê Bedrî de ke çimeyê mûcîzeyan o, hem eke gelek nimûneyê ke nê her di hedîseyan biyarî vîrê merdiman bibê, helbet beno ke bêro vatiş nê di hedîseyî qet’î yê û qewimiyayê.
Ha yo, belkî hezar nimûneyî estî ke bi hedîsanê sehîhan sabît biyê ke desto mubarek yê Resûlê Ekrem ‘eleyhîsselatu wesselamî, înan rê biyo şîfa.
