Yê diyin: Xezweyo Kubra yê Bedrî de, ke yew çimeyê ‘ecêban o, gama ke ‘Uqqaşe Îbn-il Muhessini-il Esedî, muşrîkan reyde şer kerdêne, şimşêrê ey şikiya. Resûlê Ekrem ‘eleyhîsselatu wesselamî, vera şimşêrî de, çuweyêko qalind da. Va: “Pê inê herb bike.” Nişka ra çuwe, biîznîllah, bi şimşêrêko derg û sipî. Pê herb kerd. Hendayê cuya xo, heta ke herbê Yemameyî de şehîd kewt, kiftê xo de kirişna. No hedîse qet’î yo. Çunke ‘Uqqaşeyî, temamê cuya xo de pê îftîxar kerdo û o şimşêr bi nameyê “el-‘ewn” namdar biyo.1 Ha yo, no îftîxarê Hezretê ‘Uqqaşeyî û şimşêrê eyo ke bi nameyê “’ewn”î raserî şimşêran de veng dayo, di delîlê nê hedîseyî yê.
Yê Hîrêyin: ‘Ellameyêko sey Îbnu ‘Ebd-il Berrî ra û pîlanê ehlê tehqîqî ra neqil û teshîh kenê ke Xezweyê Uhudî de, şimşêrê Ebdullah Îbnê Cehşî ke ‘emzayê Resûlê Ekrem ‘eleyhîsselatu wesselamî yo, gama herb keno, şikêno. Resûlê Ekrem ‘eleyhîsselatu wesselam darêke daya ci. Aye dare, destê ey de biye şimşêr; pê herb kerd. O şimşêro ke eserê mûcîzeyî bi, baqî mend.2 Îbnu Seyyîd-in- Nasê namdar, siyerê xo de xebere dano ke; wextêk ra pey, ‘Ebdullah, o şimşêr, bi di sey lîrayan rot merdimêk, ke nameyê ey Bûxayê Tirkî bi.3 Ha yo nê di şûrî sey asayê Mûsa, her yew tira mûcîzeyêkê ey ê. La asayê Mûsa, wefatê Mûsa ra pey, hetê eyê î’cazî nêmend; labelê nê baqî mendî.
