Ma o qismî ra des ra yew qismê ey nêva. Nika nê qismî reyra, Vateyo Vîst û pancin de, ke îcazê Quranî ser o yo, çar new’î yê new’ê îxbarê xeybiyî ke zaf hîra yî, ma bi îcmalî beyan kerdî. Ha yo, bi new’ê eyê ke tiyade yo reyde, ê çar new’ê pîlî ke bi ziwanê Quranî, xeyb ra xebere tira yena dayene piya bifikire. Bivîne ke: çiqas qet’î, bêşik, bereqiyaye, quwetin yew delîlê rîsaletî yo ke; ê ke bi temamî qelb û eqlê înan nêxerepiyayo, elbet do îman bikê ke: zatê Ehmedî ‘eleyhîsselatu wesselam, resûlê Zatêk Zulcelal o ke Xaliqî Kulli Şey o û ‘Ellamul Xuyûb o û Ey ra xebere gêno.
ÎŞARETO NUKTEYIN O HEWTIN: Mûcîzeyê Nebewî ra qismê ke derheqê bereketê teamî/werdî de yî, ma do îşaretê yew çend mîsalanê înan ê ke qet’î û me’nen mutewatirî bikî. Behsî ra ver zikrê yew muqeddîmeyî munasib o.
Muqeddîme/Vervate: Nê nimûneyê mûcîzeyanê bereketinan ke do bêrî, hetta înan ra tayî sûretêk sehîh de şiyês tarîqî reyde ameyî neqilkerdiş. Zafê înan, huzûrê cematêk girdî de qewimiyayî; merdimê muteber û sadiqî ke miyanî ey cematî de yî behsê înan kerdo û neqil kerdî. Mesela, yena neqilkerdiş ke “Hewtay merdiman, çar çeng werdî ra, ke tira sa’ yeno vatene, werdo, biyî mird.”1 Ê hewtay merdimî vateyê ey eşnawenê; tekzîb nêkenî. Yena a mana ke bi sukût tesdîq kenê. Hal no yo ke, o ‘esrê sidq û heqîqetî de û ê sehebiyê ke merdimê heqperest, ciddî û raştî, henda zerreyî zure bivînê, red û tekzîb kenî. Hal no yo ke, hedîseyê ke ma do behsa înan bikî, zafinî rîwayet kerdo û yê bînan zî bi sukût ê tesdîq kerdî. Yena a mana ke, her yew hedîse, sey mutewatirê me’newî qet’î yo.