selewat û duayanê pancin ra yewê merdimiye qezenc kerdo û nurê Ey Medîne ra beriqiyayo, kam esto? Kam eşkeno binawno?

Hem Babo Çarêsin û ayeta Hîrisine yê Încîlê Yuhenna yê tirkî wina yî: “Êdî ez şima dir zaf qisey nêkena, çunke reîsê nê alemî yeno. Û mi de, nesneyê Ey, bin ra çinî yo.” Ha tabîrê “Reîsê Alemî”, bi me’neya “Fexrê Alemî” de yo. Unwanê Fexrê Alemî zî, unwano tewr namdar yê Muhemmedê Erebî ‘eleyhîsselatu wesselamî yo.

Hewna Babo Şiyêsin û ayeta Hewtine yê Încîlê Yuhenna na ya: “Herçî ez, şima rê heqî vana. Şiyayîşê mi, şima rê havilin o. Çunke heta ez nêşîra, teselîkar, şima rê nêyeno.” Ha yo biewnî! Reîsê Alemî û oyo ke teseliyo heqîqî dano merdiman, Muhemmedê Erebî ‘eleyhisselatu wesselam ra teber, kam o? Belê, Fexrê Alemî O yo û oyo ke merdimanê faniyan îdamê ebedî ra xelas keno û teselî dano, O yo.

Hem Babo Şiyêsin, ayeta Heştine yê Încîlê Yuhenna: “O zî gama bêro, do dinya hetê guneyan ra, hetê selahî ra û hetê hukmî ra îlzam bikero.” Ha yo, oyo ke fesada dinyayî tadayo selahî û gune û şîrkî ra xelas keno û siyaset û hakîmiyetê dinyayî vurneno, Muhemmedê Erebî ‘eleyhîsselatu wesselamî ra teber, sewbîna kam ameyo?

Hem Babo Şiyêsin û ayeta Yewendesin a Încîlê Yuhenna: “Çunke hukmê ameyîşî Reîsê nê alemî ameyo.” Ha yo, “Reîsê Alemî”^(Haşiye) helbet Ehmedê Muhemmed ‘eleyhîsselatu wesselam o ke Seyyîd-ul Beşer o.

                                    (Haşiye) : Belê o Zat, reîs û sultanêko wina yo ke hezar û hîrê sey û pancas serrî de û ekser ‘esran ra her yewî de, tewr tayn, hîrê sey û pancas mîlyon tebaayê ey, raiyetê ey estê. Bi kemalê teslîm û inqiyadî, fermananê ey rê îtaet kenê, her roj ci rê selam kenî û bi no hawa bîatê xo newe kenî.