Ezcumle, bi hawayêko qet‘î sabit o û Hezretî ‘Umer, Îbnê ‘Ebbas, ‘Usame Îbnê Zeyd, Xaris û Aîşeya Siddîqe, nê heme bi hawayêko qet‘î xebere danê ke “Ma Hezretî Cebraîl, sûretê Dihyeyî de, hetê Resûlê Ekrem ‘eleyhîsselatu wesselamî de zaf vînenê.” Gelo qet mimkun o ke nê zatî, nêvînê û vajê ma vînenê?
Hem bi neqla sehîha qet’î, fatîhê Îranê Sa’d Îbnê Ebî Weqqas ke ‘Eşereyê Mubeşşere ra yo, xebere dano ke “Ma Xezweyê Uhudî de, di hetê Resûlê Ekrem ‘eleyhîsselatu wesselamî de, di muhafizê sey nobedaran ke bi cilanê sipiyan biy, diyî. Ame fehmkerdene ke ê her di zî melayket ê û ma fehm kerd ke Hezretî Cebraîl û Mikaîl ê.”2 Gelo wina yew qehremanê Îslamî ke vajo ma dî, îmkan esto ke nêdîbo?
Hem Ebû Sufyan Îbnê Xaris Îbnê ‘Ebdulmuttelib (Datîzayê Nebewî) - bi neqla sehîhe – xebere dano ke “Xezweyê Bedrî de, ma zatê cilsipiyî ke estoran ser o biy, miyanê erd û asmênî de diyî.” 3
Hem Hezretî Hemzeyî, Resûlê Ekrem ‘eleyhîsselatu wesselamî ra waşt ke “Ez wazena Cebraîlî bivîna.” Ke’be de bide nawit. Deyax nêkerd, bêhiş bi, kewt ro erd.4 Bi no hawa diyîşê hedîseyê melayketan zaf ê. Nê hedîseyî pêro, hawayêk, mûcîzeyanê Ehmedî ‘eleyhisselatu wesselamî nawnenê û delîliye kenê ke, çilaya Nubuwwetê ey rê, melayketî zî, perwane yê.