Dinya de tersê hepsî ra ti karê tewr giranan de bêeciz şuxulînî, sey Cehennem tersê yew hepso ebedî, qey hîç xeyret nêdano to ke ti seba yew xizmeto tewr sivik û weş bixebitî?

   Îqazo Pancin:

   Hey nefsê mino dinyaperest! Eceb qey îbadetî de ecizbiyayîşê to, nimajî de qusurê to, zafbiyayîşê xebat û şuxulê dinya ra yo? Yan zî seba şuxulê qezenckerdişê rizqî ra firsat nêdiyayîş o?

   Gelo qey ti yalawuz seba dinya xelq biyî ke ti wextê xo pêro aye rê serf kenî? Ti zanî hunerê to heme heywanan ra zêdêr o labelê hetê kezanckerdişê lazimiya cuya dinya ra, qewet û qudretê to sey yew mîlçike nêbeno. Ti na rastiye vînenî û çi rê fam nêkenî ke wezîfeyê to yo sifteyên sey heywanan cehd kerdene niyo. Belkî sey yew însano rastikên, seba yew cuya daîmiyo rastikên xebitiyayene yo.

   Ser de zî no xejlê dinya ke ti vanî, pêro karê veng î ke zafê înan to ra nêpersênî, ti bi xo fizulî miyan kewenî û têmiyan kenî. Ti çiyo tewr giran caverdayo, ti vanî qey seke hezar serrî ?emrê to est o, malumatanê tewr bênafan reyra rojgarê xo  viyarnenî. Rojgarê xoyê qiymetinî çiyanê bêqiymetinan reyra viyarnenî, ma vajî: “Helqayê dormareyê estareyê Saturnî senîn î” Kergê Amerîka eceb çend hebî?” Qaşo ti îlmê asmên ra û fennê îstatîstîkî reyra huner gênî.

   Eke ti vajî: “Çiyo ke mi nimaj û îbadetî ra apey verdano û mi ecizneno, nê çiyê bêfayde niyî. Rasta ey kar û xebatê riziq û qezenckerdişê  zarurî yî.”

   A game ez zî to ra vana:

   Eke ti rojê yewmiyeyê xo se quruşî bişuxulî, dima yew bêro vajo: “Bê des deqîqeyî nê cayî bikeni, ti go senîniya xo sey se poxnotî yew pirlanta û zumrut vînî.”