Wextê ‘Îşa zî, kefenê şewreşiya tarî reyra tefînayîşê rojê alemê roşn, hem kefenê zimistanê gewr reyra girewtişê riyê dinyaya merda, hem merdişê eseranê însanê merde û vîrşiyayîşê nê eseran, hem zî paydoskerdişê cuya îmtîhanê dinya vîrê merdimî fîneno. No vîrvistişê reyra zî xebat û emranê Qahharê Zulcelal zî dano zanayîş.

   Wextê Şewî zî, hem zimistan, hem tirbe, hem alemê berzaxî dano famkerdiş. Nawneno û vîrê merdimî fîneno ke ruhê însan çiqas muhtacê rehma Rehman o.

Û nimajê Teheccudî zî, nêmeyê şewî de merdimî dano zanayîş ke; no nimaj tariyê qebr de û şewreşiya berzaxî de çiqas roşniyêka lazim a merdimî hêşdar keno. Miyanê vuriyayîş û ‘elaguran de nîmetanê Cenabê Mun’îmê Heqîqiy ke bêhed û bêhesab î ano vîrê merdimî. Nawneno ke; Homa çiqas misteheqê şikr û pesnî yo.

   Şewdiro Diyîn zî, şewdirê Heşrî ano vîrê merdimî. Eya, şewdirê na şewi û wisarê nê zimistanî çiqas aqil ra dûrî niyo û lazim o û miheqqeq o, şewdirê heşrî zî, wisarê Berzaxî zî winî miheqqeq o û bêşik o.  

Demek nê her panc wextê nimajî, her yew sereyê înqilabêko muhîm î û înqilabanê girsan anî vîrê merdimî. Nînan ra vêşêr îşaretê hukûmkerdişê Qudretê Semedanî her roj, mu’cîzeyê Qudretî û xelaya Rehmetî her serri, her hezar serri anê vîrê merdimî.

Demek ferz nimajo ke wezîfeyê ewwil ê însanan, esasê ubudiyetî û deyno qet’î yo, nê wextan de layiq o û gelek zî minasîb o.

   Hîkmeto Pancin:

   Însan viraziyayîş û xeleqiyayîşê xo de gelek zeîf o, labelê heme çî têkilê ey beno, ey miyanê xem û kederan de verdanî, ey xemgên kenî. Hem gelek eciz o, labelê bela û neyarê ey zaf vêş î. Hem gelek feqîr o, labelê îhtiyacê ey bol zêde yî. Hem terral û bêqewet o, labelê barê cuyi gelek giran o.