Hîkmeto Hîrêyin:

   Senî însan no alemo girs rê yew nimûneyo qij o û Fatîhaya Şerîfi Qur-ano 'Ezîmuşşan rê nimûneyêka rewşenin a. Nimaj zî heme bêj îbadetan rê lîsteyêko nuranî yo. Û yew xerîteyo pak o ke îşaretê heme bêj îbadetê mexlûqan keno, heme tewir îbadetan xo miyan de hewîneno.

   Hîkmeto Çarin:

   Senî yew saeto hewteyin de polê ey ke saniye û deqîqe û saet û rojan hûmarenî, têde yewbînî ra ewniyênî, têde seypê yî û yew hesibênî. Winî zî na alemê dinyaya xurte ke saetê Homay a. Saniyeyê xo viyartişê şew û rojî yî. Deqîqeyê xo serrî yî. Saetê xo dewranê 'emrê însanî yî. Rojê xo dewranê 'emrê alemî yî. Têde yewbînî ra niyadanî. Têde yewbînî rê nimûne û mîsal î. Têde sey yewbînî yî. Her yew hemînan ano vîrê merdimî. Ma vajî:

   Wextê Şewdirî, heta wextê rojakewtişî, seke destpêkerdişê wisarî yo. Seba însanan nola kewtişê rehma maderî yo. Seke rojo ewwilê şeş rojan o ke ?erd û asmên tede xelq biyo. Nê heqîqetan ano vîrê merdimî. Xebatê Homayê Taela no wext de keweno vîrê merdiman.

   Wextê Teştareyî/Perojî zî, sey orteyê hamnanî yo, sey bêkemaniye xortey o. ‘Emrê dinya de zî sey wexto ke însan tede xelq biyo, îşaretê înan keno. Hemînan de xebatanê Rehmetê Homayê Taela û bereketê nîmetanê ey vîrê merdimî fîneno.

   Wextê Îreyî zî, haway payîzî, haway kokimey o, haway ‘esrê saedetê peyxamberê Axîrzemanî (a.s.w.) yo. Û xebat û emrê îlahî û nîmetê Rehmanî fîneno vîrê merdimî.

   Wextê Mexrebî zî, peyniyê payîzî de qediyayîşê ‘emrê bol mexlûqan û vîndîbiyayîşê înan û merdişê însanî, wextê destpêkerdişê Qiyemetî de zî xirabbiyayîşê dinya ano vîrê merdimî. Teceliyê girdbiyayîşê sifatanê Homayî merdimî rê dano famkerdiş, însanan hewnê xefletî ra şiyar keno, îqaz keno.