Û ê meyweyê ke dare ra bî; nîmetê dinya yî ke, Cenabê Kerîmo Mutlaq nînan nîmetê axîretî rê kerdî lîste û sey werê Cennetî viraştî ke nîmetanê axîretî biyaro vîrê merdiman, û înan nîmetanê Cennetî rê kerdo nimûne ke pê meyweyanê Cennetî rê muşteriyan peyda bikero û înan silayiya Cennetî bikerî. Û a dare ke sereyê xo hezaran meyweyan gêna, îşaretê morê Qudretê Semedanî û morê Rubûbiyetê Îlahî û morê Saltanatê Îlahî ya. Çike, “yew çî tena ra heme çî viraştene” yanî tena herri ra enwayê tewir tarûtur, darûber û meyweyî viraştene; hem tena awe ra tewir bi tewir heywanan xeleqnayene, hem basît yew werd ra heme/her cîhazanê heywanan viraştene, na ra vêşêr “heme çî ra yew çî tena viraştene” yanî endehîna werdo ciya-ciyayî ke cudarî wenî, werdoxî rê viraştişê goşto xususî kî morê Yewdê Tenayî, morê Sultano Ezel û Ebed î. Nê morî teqlîd nêbenî, bol taybetî yî. Heya, yew çî ra heme çî û heme çî ra yew çî tena viraştene, yew ayeta ke nîşanê Xaliqê heme çî kena. Nîşanê Qadirê Kullê şey a. Ey nawnena.

   Û o şîfre kî sirrê hîkmetê Xaliqî yo ke heqîqetê îmanî reyra beno a. O mifteh kî

يَا اَللّٰهُ

لَا اِلٰهَ اِلَّا اللّٰهُ

اَللّٰهُ لَٓا اِلٰهَ اِلَّا هُوَ الْحَىُّ الْقَيُّومُ

yo.

   O fekê ejdehayî ke vuriyêno beno berê baxçeyêk, îşaret keno ke: Qebre seba ehlê dalaletî, berê zindanêko teng a ke miyanî perîşaniye û xemî de sey vêreyê ejderhayî ya. Cayê bêkesey û vîrbiyayîşî ya. Seba ehlê Qur-anî, bero ke zindanê dinya ra abeno bostanê Cennetî. Bero ke meydanê îmtîhanî ra abeno baxçeyanê Cennetî.