Wextê verî de di birarî seba yew seyehato derg têreyde şonî. Badê biney şiyayîş, rayîr înan ver de beno di. Sereyê her di rayîran de merdimêko rastvaj vînenî. Ey ra persenî:

   “Kamcîn rayîr rind o?” O kî înan ra vano:

   “Rayîro rast de mecburiyetî qanûn û nîzamî rê îtaetkariye est a. Labelê miyanê giraniya îtaetkariye de emniyet û saedet est o. Rayîro çep de serbestî û azadî est a. Feqet miyanê na serbestiye de taluke û çetiniye û zehmetiye est a. Şima kamî weçînenî şima zanî.?

   Vatişê ey merdimî ra dima, biraro biaqil û weşehlaq

تَوَكَّلْتُ عَلَى اللّٰهِ

va û rayîro rast ro şi. Qanûn û nîzamî rê îtaetkariye qebul kerd. Biraro serserî û bêar/bêehlaq sirf seba serbestiye rayîro çep ro şi. Ma nika xeyalî herinda o biraro ke barê ey tebera sivik labelê manen giran ra şîrîme, ma halê ey temaşe bikerîme.

   O merdim şi, koyan û newalan ra viyart. Kewt yew deşta bêveng û bêkese. Xafila yew sewto biters û xofin hesna. Dî ke yew şêro bixof miyanê birrî ra vejiya gala ey keno. O kî tera rema. Ta rastê yew bîro bêaw û şeşt herînî/erşin ¹  xorîn ame. Tersan ver xo çeng kerd miyan. Nêmeyê bîrî de rastê darêk ame, pêt dare tepîşt. Dara ke dêsê bîrî ra zergûn biybî di reyeyê aye est bî. Di merreyî, yew sipî û yew siya her di reyeyê a dare bidom kojenî. Xo ra cor niyada dî ke; şêr sey yew nobetdar ser fekê bîrî de vinderteyo. Xo ra cêr niyada dî ke; ejderhayêko xişin sereyê xo berz kerdo, xo nizdiyê linganê ey kerdo. Fekê ejderhayê sey fekê bîrî hera bi. Dêsê bîrî ra ewniya dî ke; pirr kerm û kêzî ke kê de danî dormeyê ey girewto.