Welhasil: Senî şikir nîmetî zêdneno; winî zî, gerre musîbetî zêdneno. Hem layîqbiyayîşê merhametî betal keno. Serra yewin ê Herbê Dinya o Yewin de, Erzurum de yew peyayo mubarek yew nêweşîya gelek girani kewtibi. Ez şiya hetê ey. Mi ra va: “Se şewî yo ez nêşna sareyê xo balişna ser na bibusa” no tewir pîzweşney reyra mi rê gerreyê xo kerd. Pîzeyê mi zaf ci veşa. Nişka mi vîr kewt û mi va: “Birayê mi, se rojî toyê sixintîyin ê vîyarteyî nika dekewtê herinda se rojî zerrweşîye. Înan fikirîyayîş reyra gerre meki. Înan ra bewni şikir biki. Rojî ke yenî zî, madem hama nêhameyî, bawerîya xo Rebbê xoyo Rehmanurrehîm bîyari, çokanî xo mekuwi, mebermi, hîç ra metersi, rengê estbeye (wicûdî) medi çinbeye (çinbiyayîşî). Na saete bifikîri. Qewetê sebrî, ke to do, qîmê na saete keno. Sey yew qumandano sersemî meki, ke qewetê dişmenî ê hetê çepî pêro daxilê qewetê ey ê hetê raştî biyayîş reyra ey rê bîyo qeweto teze, cîheto raşt ê dişmenî, ke hetê eyê çepî de yo, hama nêameyo o warzeno qewetê merkezî erşaweno kîşta raşti û çepi, merkezî zeîf verdano, dişmen yew qewetê qijkekî reyra merkezî tarûmar keno.” Mi va: “Birarê mi, ti sey nê qumandanî meki. Heme qewetê xo na saete rê tehsîs biki. Rehmetê îlahîyeyî û mukafatê uxrewîyeyî û ‘emrê xoyê kilm û fanîyî bifikiri ke ti ey vurînenî kenî derg û ebedî. Herinda no gerreyo dejin yew şikro fereh biki.” Ey zî yew rehetîya tam girewti, va “Elhemdulîllah, nêweşîya mi des ra hamey war, bîy yew.”

   NUKTEYO PANCIN

   Hîrê Mesele yo

   Meseleyo Yewin: Musîbeto raştikên û musîbeto mizir, musîbeto ke dîn rê yeno yo. Musîbetê dînî ra ganî her dem kê xo defînî/bierzî dergahê îlahî û biqîrîyî.