DERMANO VÎST Û ÇARIN

   Ey nêweşmiqaytkerdoxê ke xizmetê gedeyanê bêguneyan ê nêweşan û xizmetê extîyaran kenî, ke herinda gedeyanê bêguneyan de yî! Vernîya şima de yew bazirganîya muhîma uxrewî esta. Pê şewk û ğeyret, a bazirganey xu dest fînî. Zaf hîkmetanê nêweşeya qeçekanê masuman ra: Semedê heyatê înan ê dinya rê, ê wicudanê nazikan rê yew îdman o, yew rîyazed o, û semedo ke vera şemataya dinya bieşkî xu ver bidî yew şiringa û yew terbîyeyê rebbanî yî. Semedê heyatê înan ê ruhanî û manewî rê, îstîqbal de yan zî axîret de, benî şiringa. Û benî sebebê guneyan ra pakbiyayîşê pîlan û benî kefaretê guneyanê înan. Hetê ehlê heqîqet ra ispat bîyo ke; sewabo ke nêweşeya înan ra yeno, defterê ‘emelê may û pîyê înan de nusîno, taybetê defterê ‘emelê maya ey/aye de nusîno ke, sirrê şefqat reyra, sihhetê tutê/tuta xu tercêhê sihhetê xu kena.

   Pê rîwayeto sehîh û pê gelek wuquatan îspat bîyo ke, extîyaran miqaytkerdiş, hem sewabêko gird dano qezençkerdiş - duayanê ê extîyaran girotiş, taybetê eke bawk û dayk bibî, û înan zerrweş kerdiş û wefakarane xizmetê înan kerdiş- hem na dinya de hem axiret de beno sebebê keyfweşey. Zaf wuquatan reyra îspat bîyo ke, yew ewlado bextîyar eke bawk û dayka xuyê extîyarî rê tastamam îtaet biko, ewladê xu ra zî eynî wezîyetî vîneno. Yew ewlado bedbext, eke zerra ma û pîyê xu, xu ra verdo (zerra înan bişikno), bêğeyra ezabê axretî, dinya de zî zaf feleketan reyra cezayê xu anceno. ^(*)

   Belê, tena xizmetê extîyaran, masuman û merdimanê xu kerdiş ney, belkî gama kê raştê ehlê îman bêrî –semedo ke sirrê îman reyra mabên de birayeya raştikên esta- eke nêweş û muhtac bo, gan û ruhê xu reyra, ey/aye rê xizmet kerdiş esasê îslametey ra yo.