DERMANO HEŞTÊSIN

   Ey nêweşo ke şikirkerdişî ra fek veradayo û şîkayet keno! Şîkayet heqdarey ra yeno. Cey yew heqê to vîndî nêbîyo ke ti şîkayet kenî. Belkî to sero zaf heqî estî ke ti şikir bikerî, la to nêkerdo. To hema heqê Cenabê Heqî nêdayo, ti wariştî bêheq, seke ti dawaya heqî bikî, şîkayet kenî. Ê ke mertebeyê xu to ra berz î û wayîrê sihhetî yî, heqê to çinîyo ti înan ra bewnî û halê xu ra şîkayet bikerî. Belkî, ê nêweşê belengazê ke hetê dereceyê sihhetî ra to ra cêr de yî, ti ganî înan ra bewnî û şikir bikerî.î Eke sew destê to şikite bo, destqopalan ra bewni. Eke yew gillîya to çinî bo, her di çiman ra nusxan, koran ra bewni, Homay rê şikir biki.

   Belê, heqê çewî çinîyo ke, hetê nîmetî ra, xu ra coran ra bewno û halê xu ra şîkayet bikero. Û demê musîbet de heqê her kesî; kesê ke ey ra vêşêr raştî musîbetî hameyî înan ra ewnîyayîş o, ke pê şikir bikero. No sir tayn rîsaleyan de yew temsîl reyra îzah bîyo. Kilmê ey no yo ke:

   Peyayêk, yew belangazî vejeno mînare ser. Her dikeka mînare de ey rê tewir bi tewir holey keno û xelatan dano, xelatêka tewr xişni zî tam sereyê mînare de dano. Vera ê xelatanê tewir bi tewiran, ey ra teşekkur û minnet wazîyeno, labelê, o merdimo ‘eynad, ê heme xelatê ke her yew dikek de ey rê hameyî dayîş, eger hemînan xu vîra bikero yanxo înan çî nêhesibno, şikir nêkero, xu ra hîna cor bewnîyo. Dest bi şîkayetî biko û  “Werrekîna na mînara daha derg bibîynî, ez bivejeynî hîna berz.Qey çi rê haway ê koyî yanxo sey a mînaraya bîni zaf berzi nîya?” vajo, çiqas kufranê nîmet o, yew neheqey a. Eynen wina zî; însan çinbiyayîş ra hameyo meydan, kerra nêbîyo, dari nêbîyo, heywan nêmendo, însan bîyo, bisilmane bîyo, zaf reyan sihhet û afîyet de, yew dereceyo berz de, nîmetan mîyan de yo, la ge-ge sey sihhet û afîyet layiqê tayn nîmetan nêbo, yanxo tercîhanê xuyê xiraban yanxo kerdeyanê xuyê xiraban ra nê nîmetî destê ey ra bivejîyî yan zî semedo ke destê ey tayn nîmetan nêresenî, dest bi şîkayetî bikero, bêsebir têbigeyro, “Hey wax mi se kerd ke nê mi sareyê ser de hameyî?” vatiş reyra rubûbîyetê îlahîye rexne kerdiş, nêweşeya maddî ra daha musîbetin yew nêweşey a. Seke desto şikite reyra dekewo pêrodayîş, şîkayetê xu reyra nêweşeya xu zêdneno. Baqil o yo ke pê sirrê

لِكُلِّ مُص۪يبَةٍ اِنَّا لِلّٰهِ وَاِنَّٓا اِلَيْهِ رَاجِعُونَ

reyra teslîm bibo, sebir bikero, ta a nêweşey wazîfeyê xu ca bîyaro, şîro.