DERMANO HÎRESIN

   Ey merdimo bêçareyo ke nêweşey ra gerre keno! Nêweşey taynan rê yew xiznaya muhîm a, gelek qîmetdar yew xelata îlahî ya. Her nêweş şêno nêweşeya xu no bêj bihesibno.

   Madem, ma wextê ecelî nêzanî; Cenabo Heq, semedo ke însanan bêomideya mutlaq û ğefleto mutlaq ra bixelisno, înan mîyanê xof û rîca de verdo, û semedo ke înan hem nuqtaya muhafezeyê dinya û hem ê axretî de bitepşo, hîkmetê xu ra, wextê ecelî nêdayo însanan zanayîş.  Madem ecel her wext şêno merdim sareyê ser de bêro, eger merdimî mîyanê ğefletî de bitepşo, yew zeraro pîl dano heyatê eyê ebedîyî ro. Nêweşey ğefletî vila kena, axîretî ana vîrê merdimî, mergî dana merdimî fikirîyayîş, merdim zî ayhawa hedreyeya xu keno. Gilingan hende yew qezenç xu dest fîneno ke, mertebeyêko vîst seran de nêşno qezenç bikero vîst rojan de qezenç keno.

   Kirra qali, embazandê ma ra –Homay rehma xu yînan bikero- di ciwanî estbîy: Yew Sebrîyo Îlamij, o bîn Îslamkoy ra Wezîrzade Mistafa. Nê her di peyayî, mîyanê şagirdanê mi de her çiqas bêqelem bîy (nuştişê înan çin bi) zî, mi dîynî û ez şaş mendînî ke, samîmîyet û xizmetvînayîşê îmanî de rêza tewr vernîni mîyan de yî. Mi hîkmetê ey nêzanaynî. Gama înan dinyaya xu bedilnay, mi fehm kerd ke, her diyan de zî yew nêweşeya ğidari estbî. Şîretê a nêweşey ra, herinda xortanê ğafîlan û ferzanterkkerdoxan, yew teqwaya tewr muhîmi reyra xizmetêndo tewr qîmetin û karê ke layîqê axîretî yî kerdî. Înşaellah, di serrî ezêtê/zehmetê nêweşeya înan, bîy medarê zerrşadîya heyatê ebedîyî ê mîlyon serran. Ez nika fam kena ke, duaya ke mi seba sihhetê înan kerda, heyatê înan ê dinya rê se beddua bîya. Înşaellah, a duaya mi semedê sihhetê uxrewî qebul bîya. Hayo, nê her di peyayî, goreyê îtîqadê mi, hende xişn yew xeyr xu dest vistî ke kê des serrî teqwa reyra encax xu dest fîneno. Eger her diyan sey tayn xortan, sihhet û ciwaneya xu ra paşt bigirotinî û xu bidevistinî ğeflet û sefahetî, merg zî înan tam mîyanê gemara guneyanê înan de înan rê bihameynî, go tirba xu herinda xiznaya nurî de bikerdinî çala eqreb û maran.

   Madem inawa menfaetê nêweşey esto. Aye ra gerre ney, tewekkul û sebir reyra, şikir kerdiş, paşta xu rehma Homay bestiş îcab keno.