DERMANO PANCIN

   Ey nêweşo ke nêweşey bider sawîyaya! No wext de, pê tecrubeyanê mi, yeqînê mi bider hameyo ke, nêweşey tayn kesan rê îhsano îlahî yo, yew hedîyeyo rehmanî yo. Ez layiq nîya la no heşt-new serrî yo tayn peyayê ciwanî, poxtê nêweşey ra, seba dua waştişî hameyê zîyaretîya mi. Mi hêşê xu ser na ke: Mi kam xortê nêweşî dî; gorebê sewbîna xortan despêkerdo axîretê xu duşmîşîno. Serxoşeya ke cahîley ra yena, tede çinîya. Heweso heywanî ke ğeflet ra yeno, yew derece, xu tira xelisnayo. Qelbê mi mi ra vatinî û mi zî înan îqaz kedinî ke a nêweşeya înan -ke kê daymîş bider beno- yew îhsano îlahî yo. Mi vatinî: “Birayê mi ez duştê na nêweşeya to dir nîya. Semedê nêweşey qesebaya mi û pîzeyê mi to nêveşenî ke ez dua bika. Heta ke nêweşey to tam hayîdar biko, sebir biki. Û kam gama ke nêweşey wazîfeyê xu qedîna, Xaliqo Rehîm go înşaellah şîfa bido to.” Hem mi vatinî: “Tayanê/çağandê to ra qorînan, belayê sihhetî ra kewenî ğeflet, nimajî teriknenî, tirbi nêfikirînî, Homay xu vîra kenî, yew saet keyfo hazir ê heyatê dinya reyra, yew heyatê xuyê ebedîyî lerznenî, darbi danî piro, belkî xeripnenî. Labelê, ti, her hal de, çimê nêweşey reyde, pey tirba xu, ke yew menzîlê to ya ke ti go şîrê, û pey aye de menzîlanê uxrewîyan vînenî, û ti gorebê înan têgeyrenî. Dêmek nêweşey seba to yew sihhet o; qorê tayanê /çağandê to rê zî sihhet yew nêweşey a.”

   DERMANO ŞEŞIN

   Ey nêweşo ke elem ra gerre keno! Ez to ra persena: ‘Emrê xuyê vîyarteyî biduşmîşi û mîyanê ê ‘emr de rojanê lezzetinano şadan, û wextanê belayinan û eleminan bîyari vîrê xu. Her hal de, ti go ya “ox” yan “ax” vajî. Yanî, qelb û zonê to, yan go “Elhemdulîllah şikir.” Yanxo “Hey wax. Way limin, way limin.” vajî. Hêşê xu rind ser ni (bala xo bidi ci), çîyê ke “Ox, Elhemdulîllah şikir” danî to vatiş; elem û qedayê ke to sareyê ser de hameyî yî, fikirîyayîşê înan yew lezzeto manewî dano to ke qelbê to şikir keno. Çunke, zewalê eleman lezzet o.