DERMANO DIYIN

   Ey nêweşo bêsebir! Sebir biki, belkî şikir biki. Na nêweşeya to eşkena her yew deqaya ‘emrê to sey saetêk îbadet bido hesibnayîş. Çunke îbadet di qismî yo: Yew; ibadeto musbet o, ke sey nimac, nîyaz hetê her kesî ra yenî zanayîş. O bîn; îbadeto menfî yo, ke mûsîbetzede pê wasiteyê nêweşey û mûsîbetan acizey û kemaneya xu hîs keno, îltîcayê Xaliqê Rehîmê xu keno û Ey rê lebîno. Safî û bêrîya, beno wayîrê îbadetêko manewî.

   Belê, rîwayeto sehîh de esto ke; ‘emrêko nêweşey reyra vêro, semedê bawermendî/mumînî -eke gerre û şîkayetê Homay nêkero- ibadet hesibêno. ^(*)  Hetta bi rîwayeto sehîh û bi keşfîyatê sadiqan sabît o ke, her yew deqaya nêweşê sebirdar û şikirdarî kewena herinda saetêk îbadetî, û her yew deqaya tayn wayîrê kamilan dekewena herinda rojêk îbadetî. Nêweşeya ke yew deqaya ‘emrê to kena sey hezar deqayan û ‘emrêko derg dana to qezençkerdiş, tira gerre û haho ney, şikir biki.