Hem jî mirov jê şaş dimîne û pê diêşe ku ehlê heq û heqîqetê wê hêza pir mezin ya di îttîfaqê de bi îxtîlafê li haşê dibin. Ehlê jirêketin û nîfaqê jî digel ku li dijî bîrûbaweriya wan e jî, ji bo ku hêza girîng ya di îttîfaqê de bi dest bixin dibin yek, îttîfaqê çêdikin. Loma jî eger ew deh bin jî nod kesî ji ehlê rastiyê têk dibin.
(Kastamonu Lahikası: 212)
***
Cîhanşumûliya Rîsaleyên Nûr
Rîsaleyên Nûr tenê hilweşandineke weke ya xaniyekî piçûk tamîr nake. Rîsaleyên Nûr keleheke hilweşiyayî ya ku kevirên wê bi qasî çiyayan mezin in û bi firehbûna xwe Îslamiyetê dorpêç dike, tamîr dike. Û tenê dilekî yan jî wijdanekê îslah nake, ew raya gel û wî dilê giştî ku ev hezar sal in bi alavên pîs tê qulkirin jî tamîr dike. Bi taybetî jî Rîsaleyên Nûr dixebite ku wijdana giştî ya ku ji ber hilweşîna bingeh, nîşan û bizavên Îslamî xira bûye tamîr bike. Wan birînên kûr bi awayê ayetên Qur’anê yên bêmînak, bi dermanekî îmanî derman bike.
Helbet divê mirov ji dax û birînên weha kûr re dermanên rast ku hatine ceribandin, ji pirsgirêkên bi vî rengî mezin re çareseriyên bi delîl û saxlem peyda bike. Ha Rîsaleyên Nûr ku ji mu‘cîzetiya manewî ya Qur’ana Mu‘cizu’l-Beyan derketiye wê wezîfeyê dike. Rîsaleyên Nûr di mertebeyên îmanê, yên bêhed û bêhesab de dibe sebebê pêşveçûna manewî û keşfê.
Axaftin weha çêbû, min jî bihîst û pir şukrê Xwedê kir, li vê derê kin vedibirim.
(Kastamonu Lahikası: 21)
***
Parçeyên Rîselyên Nûr ji sedan zêdetir tilsimên şerî‘et û Qur’anê, mu‘emmayên wê derdixin holê û ji hev safî dikin. Rîsaleyên Nûr bêdînên herî bi rik disekinîne, mijarên weke mî‘racê û heşra cismanî ku mîna ji aqil dûr têne hesabê li ber çavên feylezofên bêdîn û zendîqên serhişk bi rastiyên Qur’anê mîna hebûna rojê îsbat dikin û hinekan ji wan jî tîne îmanê. Belê, wê demê helbet Rîsaleyên Nûr rastiyeke Qur’anê ye ku hem dema xwe û ya pêşiya xwe û hem jî erd û ezman bi xwe ve elaqedar dike û di destê ehlê îmanê de şûrekî elmas e.
(Emirdağ Lahikası: 29)
***
