B. METODA XIZMETÊ

   Di vî zemanî de bizavên wisa hakim hene ku her tiştî li ser hesabê xwe dikin. Mesela, eger ew zatê ku xelk li hêviyê ne niha were, ji bo ku tevgera xwe neke binê tesîra wan bizavan, bi texmîna min wê dev ji qada siyasetê berde û hedefa xwe biguherîne.

   Hem jî sê mijar hene: Yek jiyan, yek şerîet, yek jî îman e. Ji hêla rastiyê ve ya herî girîng û mezin mijara îmanê ye. Lê niha wisa tê xweyakirin ku di nezera xelkê de mijarên herî girîng jiyan û şerîet in. Eger ew zat niha li vir be, ji ber ku di nav mirovan de guherandina hersê mijaran bi carekê ne li gorî adetê Xwedê ye, wê pêşî mijara herî girîng ji xwe re bike hedef û herduyên din paşî bike da ku paqijiya xizmeta îmanê li cem xelkê xira nebe. Hem jî da ku di aqilê mirovan yê ku pir zû tê xapandin de bide nîşandan ku xizmeta îmanê ji mebestên din re nabe alet.

   Hem jî ev bîst sal in ku exlaq di bin vê zilma dijwar de ewqas xira bûye ku êdî qencî û rastî nemane û mirov ji bîstan jî baweriya xwe bi yekî naîne. Ha li hember vê rewşa xirab; sebat, berxwedan, rastî û hezkirina Îslamê lazim in, yan na tu encam ji vê rewşê dernakeve û wê zirarê bide mirovan.

   Naxwe xizmeta herî xalis û xweş, ya herî girîng û serkeftî ew xizmeta pîroz e ku şagirtên Rîsaleyên Nûr di wê çarçeveyê de dikin.

(Kastamonu Lahikasi: 46)

***

   Xalên Dereceya Pêşîn

   Madem însan ne ji laş tenê ye, divê mirov dil, ziman, aqil û mêjî jê neke û pê nede xwarin. Mirov nikare van endaman ji laş re bike qurban, ew jî îdarê dixwazin. Madem deriyê tirbê nayê girtin û madem piştî mirinê, meraqa paşeroja jiyanê ji herkesî re mijara herî girîng e, naxwe ew qanûnên ku însan jê re hurmet bike û li gorî wan tevbigere tenê ne yên jiyana wî ya dinyayê ne.