Mela Hamid (Ekinci): Hê dema ku zarok bûye, li Wanê Bedîuzzeman nas kiriye. Li Mizgevta Nûrşînê xizmeta Bedîuzzeman kiriye. Dema ku Bedîuzzeman li Çiyayê Erekê ketiye înzîwayê jî pê re maye. Mela Hamid di sala 1984an de wefat kiriye.
Meqasid (Şerhu’l-Meqasid): Navê berhema Se‘dê Teftazanî ya derbarê ilmê kelamê de ye.
Mesela Îmametê: Binêre: Îmamet.
Mesnewiya Şerîf: Berhema Mewlana Celaleddînê Rûmî ye, bi Farisî hatiye nivîsîn û ji şiîrên dîdaktîk pêk tê. Mewlana Celaleddînê Rûmî şiîrên Mesnewiyê di demên cihê de gotine, ev şiîr ji aliyê şagirtê wî Husameddîn Çelebî ve hatine nivîsîn. Mesnewî 25.700 malik e û tê de mijarên mîna marîfet, hikmet û tesewwufê bi hîkayeyan hatine vegotin.
Mewlana Celaleddînê Rûmî: (1207-1273) Celaleddînê Rûmî li Belxa bakurê Efxanistana îro hatiye dinyayê. Ji ber êrîşa Moxolan tevî malbata xwe koç kiriye, hatiye li Qonyayê bi cih bûye. Piştî ku Şemsê Tebrîzî nas kiriye, berê xwe daye tesewwufê. Ramanên xwe di şiîrên ku bi Farisî nivîsîn de anîne ziman. Berhemên wî yên herî navdar ev in: Mesnewî, Dîwana Kebîr û Fîhî Ma Fîh.
Mewlana Şêx Xalid: (1779-1827) Ebu’l-Beha Diyau’d-Dîn Xalid b. Ehmed b. Huseyn eş-Şehrezorî el-Kurdî. Bi piranî weke “Mewlana Xalid” tê zanîn. Damezrênerê şaxa Xalidî ya terîqeta Neqşî ye. Li nehyeya Qerebaxê ya bajarê Silêmaniyê hatiye dinyayê. Di ciwaniya xwe de ji gelek aliman ders sitandiye, di ilmên dînî de bûye pispor û di Medreseya Silêmaniyê de 7 salan muderristî kiriye. Bi munasebeta Hecê yekî Hindistanî nas kiriye û berê xwe daye tesewwufê. Piştî demekê çûye Delhiya Hindistanê, cem Ebdullah Dehlewiyê şêxê Terîqeta Neqşebendî. Li wir bûye peyrewê wî, jê xelîfetî standiye û vegeriyaye Silêmaniyê, dest bi xebata îrşadê kiriye. Ji ber ku şêxên herêmê ji xebatên wî aciz bûne çûye Bexdayê. Li Bexdayê di encama îrşada wî de gelek mirîdên wî çêbûne. Ji wir jî çûye Şamê û li wê derê bi cih bûye. Ji bo ku mirîdên xwe yên ku hertim di axa Osmaniyan de zêde dibûn îrşad bike, gelek xelîfe tayîn kirine. Bi taybetî jî li deverên ku Kurd lê pir bûn û li Îraq, Sûrî, Balkan û Kafkasan nav û dengê wî belav bûye. Şaxa Xalidiye ya Terîqeta Neqşebendî ku wî ava kiriye, di nava terîqetê de şaxa herî mezin e. Mewlana Xalid ji Qudsê bi rê ketiye ku here Hecê, lê bi nexweşîna taûnê ketiye û li nêzîkî Şamê wefat kiriye.
