Ceylan (Çalışkan): Ebdulqadir Ceylan Çalişkan di sala 1929an de li Emîrdaxê hatiye dinyayê. Bavê wî Mehmed Çalişkan e, dêya wî jî Ayşe Çalişkan e. Di dawiya umrê xwe de zewiciye. Zarokeke wî çêbûye lê hê ku zaroka xwe nedîtî wefat kiriye. Bedîuzzeman derbarê Ceylan de weha gotiye: “Ceylan wekîlê min e. Tiştên bi Rîsaleyên Nûr re elaqedar bin, ew di şûna min de wan dike.” Hişyarî, not û pesindanên Bedîuzzeman derbarê Ceylan Çalişkan de hene. Espriyên herduyan jî di nav şagirtên Rîsaleyên Nûr de belav bûne. Ceylan di Tebaxa sala 1963an de, di rêya Bakirkoyê de qezaya trafîkê kiriye û rehmet kiriye.
Cibrîl: Binêre: Cebraîl (e.).
Daru’l-Hikmetî’l-Îslamiye: Akademiyeke Îslamî ye, ya dema dawî ya Împeretoriya Osmanî ye, ji bo ku meseleyên dînî yên Împeretoriya Osmanî û alema Îslamê çareser bike û bi awayekî ilmî bersiva êrîşên li ser Îslamê bide, hatiye damezrandin. Di 25ê Tebaxa sala 1918an de, ji aliyê Mehmed Reşadê Çaran û Şeyxulîslamê wê demê Mûsa Kazim ve hatiye avakirin û heta bi sala 1922an dewam kiriye. Bedîuzzeman jî di nav endamên Daru’l-Hikmeti’l-Îslamiye de bû.
Deccal: Di dînên semawî de, mirovekî ku xwediyê taybetmendiyên fewqelade ye, derketina wî ji elametên qiyametê ye û dixwaze însanan ji rêya rast dûr bike. Li gorî ferhengê “deccal” sifetek e ku ji koka “decl”ê çêbûye. Peyva “decl”ê tê van maneyan: nixumandina tiştekî; nîşandana heqiyê wek batil û ya batil jî wek heq; boyaxkirin, neqişandin. Di Qur’ana Pîroz de peyva deccal derbas nabe. Di hedîsan de jî bi peyva “mesîh” re, weke “el-Mesîhu’d-Deccal” hatiye bikaranîn. Maneya mesîh, yanî: ‘Kesê xirab ku çavekî wî û birheke wî tunin û bi niyeta xapandinê gotinên xweş dibêje.’ Li gorî ku di hedîsên sehîh de hatiye rîwayetkirin, mirovekî pir xirab e, di axirzeman de tê û li ser hesabê kufra mutleq li dinyayê fesadî û xirabiyê dike.
Dihye b. Xelîfe: (wefat: 670) Dihye b. Xelîfe Ferye el-Kelbî. Sehabiyê ku Pêxember (e.s.w.) weke peyamnêr şiyande cem Heraklius. Di çavkaniyan de bi îttîfaq hatiye gotin ku Cebraîl di şiklê Dihye de wehy ji Pêxember (e.s.w.) re dianî, gelek sehabiyan jî wisa dizanîn ku bi rastî ew Dihye bûye. Hedîsên ku Hz. Dihye rîwayet kirine li dora pêncan in.
