Bûyera 31ê Adarê: Piştî îlankirina Meşrûtiyeta Duyem, di sala 1909an de, li Stenbolê li hember Sultan Ebdulhemîd serhildanek çêdibe. Ji ber ku ev serhildan di 31ê Adara sala 1325ê Rûmî çêdibe, jê re Bûyera 31ê Adarê tê gotin.
Bûyera Adarê: Binêre: Bûyera 31ê Adarê.
Bûyera Cemelê: (656) Herba ku di navbera hêzên xelîfeyê çaran Hz. Elî û hêzên Hz. Telhe, Zubeyr û Hz. Aîşe de derketiye. Ji ber ku Hz. Aîşe li ser deveyekê (cemel) beşdarî herbê bûye, ji vê herbê re Bûyera Cemelê hatiye gotin. Sebebê şer ew bû ku Hz. Elî ji bo dîtin û cezakirina qatilên Hz. Osman hinekî muhlet dixwest. Lê Hz. Telhe, Zubeyr û Aîşe jî israr dikirin ku ev mesele di cih de çareser bibe. Ji ber ku mijareke îctîhadî hatiye qada siyasetê û şer jî ji ber vê derketiye, alimên Îslamê di ramana xwe de bûne yek û gotine ku kuştiyên herdu aliyan jî şehîd in. Ji ber vê jî selefê salih munasib nedîtine ku îxtîlafên navbera sehabiyan bêne munaqeşekirin.
Bûyera Şêx Seîd: Binêre: Serhildana Şêx Seîd:
Buzurgmehr (Buzurgmihr): Buzurgmihr b. Behtegan ji bajarê Merwê ye, wezîrê navdar yê Nûşîrewanê hukumdarê Sasaniyan e. Gelek gotinên wî yên ku bûne derbûmesel hene.
Cami‘u’l-Ezher: (Zanîngeha Ezherê). Kulliyeya alema Îslamê ya herî kevn ku navenda xwendin û perwerdeyê bû. Di dema Fatimiyan de, di sala 972an de, li bajarê Qahîreyê hatiye avakirin. Ji ber ku Fatimiyan ji Ehlê Beytê pir hez dikirin, bi leqeba Hz. Fatîme “el-Ezher” (pir ronak, pir xweşik) binavkirin. Pêşî xebatên xwendin û perwerdeyê di mizgevtê de dest pê kirine û weke helqeyên dersê dewam kirine. Paşî di dema Memlûkiyan de li kêleka mizgevtê medrese, kutûbxane û cihê mayina xwendevanan (rewaq) hatine avakirin, ji bo mamosteyan jî ode hatine çêkirin. Bi vî awayî Camî‘u’l-Ezher li deverên cihê wek kulliye belav bûye. Cami‘u’l-Ezher di dema Memlûkiyan de hem navenda ilm û çandê, hem jî cihê daxwiyaniyên girîng yên hukûmetê bû. Herweha cihê civîna alim, edîb û sin‘etkaran jî bû. Ji ber ku ehlê ilmê, li rojhilat ji ber zordestiya Moxolan û li rojava jî ji ber ya Filehan revîne û koçî Misrê kirin, Cami‘u’l-Ezher di qada tîlaweta Qur’anê (zanista xwendina Qur’anê), ilmên Qur’anê, fiqih, hedîs, tefsîr û zimannasiyê de bû navenda mezin ya perwerdeyê.
