Beyheqî: Navê kîtaba hedîsên sehîh es-Sunenu’l-Kubra ye. Ji ber ku navê berhevkarê vê berhemê Beyheqî ye, ji kîtabê re Sunena Beyheqî û carna jî bi kurtayî Beyheqî tê gotin. Beyheqî (wefat: 1066) li gundê Xusrewcidî yê Beyheqa Nîşabûrê hatiye dinyayê. Muheddisekî mezin û fiqihzanekî mezhebê Îmamê Şafiî ye. Navê wî Ehmed b. Huseyn el-Beyheqî ye. Di xortaniya xwe de ji alimên mezin yên wê heyamê ders sitandine. Di mijarên hedîs û fiqhê de weke otorîte tê qebûlkirin. Bi sedan berhemên wî hene. Li gorî ku alimên fiqhê dibêjin, es-Sunenu’l-Kubra li gorî fiqha Şafiî hatiye tertîbkirin, tê de gelek hedîsên ku di kîtabên din yên hedîsê de tunin cih girtine û gotinên cihê yên sehabî û tabiiyan digel rîwayetên wan tê de ne.
Bid‘e: Binêre: Bid‘et.
Bid‘et: Ev peyv di erebî de tê maneya “îcadkirin, nûçêkirina bêmînak, çêkirin.” Wek tabîr ji bo “bawerî, îbadet, fikr û tevgerên ku piştî esra seadetê derketine û tu delîleke wan ya şer‘î tune” re tê bikaranîn. Alimên Îslamê bid‘et kirine du qisim: Bid‘eta Hesene û Bid‘eta Seyyie. Wek delîl jî ev hedîsa han nîşan dane: “Kî rêyeke rind veke, heta ku xelk li pey wê rêyê herin xêr ji xwediyê wê rêyê re tê nivîsîn. Kî rêyeke xirab jî veke, heta ku xelk di wê rêyê de herin, guneh ji xwediyê wê re tên nivîsîn.” Yên ku bi maneyeke teng bid‘etê tarîf dikin jî maneyeke weha didinê: “Kêmkirin û zêdekirina tiştên dînî ku di dema Pêxember (e.s.w.) de tunebûn.” Li gorî vê ramanê tiştên ku elaqeya wan bi dîn re tune, ne bid‘et in.
Bolşewîzm: Teorî û pratîzekirina ramana Komunîzmê ye ku ji hêla Lenîn ve dihate parastin. Bolşewîzm, terefdariya bi şoreşê pêkanîna îqtîdara proleteryayê ye. Di destpêka sedsala 20an de Partiya Sosyal Demokrat ya Rûsyayê ya di bin serekatiya Lenîn de hatiye avakirin. Armanca vê grûba zêde şoreşger, pêkanîna şoreşa proleteryayê bû. Ramana Bolşewîzmê ku ji hêla şoreşgerên profesyonel ve dihate dozkirin, fikra partiyeke siyasî ya merkezî diparast.
Burca Babîlê: Burca Babîlê tê maneya, îbadetxaneya ku serê xwe bi ezman ve bilind kiriye. Herweha sembola wê ramanê ye ku dibêje, “tevlîheviyên dinyayê û zimanên wê hemî ji zimanekî çêbûne.” Di Încîlê de tê gotin ku Burca Babîlê piştî tofana Nebî Nûh li welatê Şînarê (Babîlê) hatiye avakirin.
