Ya Heftan: Armanceke din jî ew bû ku nehêlin azadî şamilî ser sefahetê jî bibe, bi perwerdeya şerîetê were sînorkirin, qisasî û destjêkirina ku ji siyaseta şer‘î dizanîn, bêne tetbîqkirin.

   Lê zemîn teqan bû, xefk û davik hatibûn danîn. Û tişta herî pîroz ango îtaeta leşkerî jî hate fedakirin. Sebebê herî bingehîn û mezin terefgirtin û munaqeşeya xerezkarane ya partiyan û keşmekeşa rojnameyan bû ku di şûna ragihandinê de mubalexe dikirin, derew digotin û îftira dikirin. Çawa ku mirov her heft rengan bizivirîne tenê spî xweya dike; wisa jî di nav van her heft daxwazan de tenê ronahiya şerîetê xweya kir, lewra şerîet bendê dikişîne pêşiya xirabiyê.

   Eger mirov li van her heft xalan bifikire, wê di heryekê de mu‘cizeya navê şerîetê xweya bike. Di neh-deh mehan de rojnameyan weşaneke kelecanî kirin; partiyan fedaî li komeleyan nivîsîn; kesên ku înqilab çêkirin, zordestî dikirin; azadiya mutleq ya li dijî îtaeta leşkerî êdî ketibû nav ferdan. Hinekan tiştên ku weke muxalifî qaîdeyên dîn zenn dikirin, ji xelkê re digotin û di nav wan de belav dikirin. Piştî ku îtaet xira bû êdî kesên zordest, paşverû û yên ku di dîn de hessas, lê di muhakemeya eqlî de nuqsan bûn jî -bi niyeta qenciyê- dest pê kirin, di wê teqanê de tov çandin. Siyaseta dewletê ya giştî di destê mirovên nezan de ma, nêzîkî milyonekî fişek hatin teqandin. Mudd‘eiyên xêrnexwaz jî li hundir û derve destê xwe xistin nav meselê û her cih bû anarşî... Loma jî armanca tevgerê bû alozî û tevlîhevî. Destê biyaniyan tê de hebû. Lê ji terefê Xwedê ve navê şerîetê ew rûhên xebîs ku ji wan sebebên cihê [yên li jorê] çêdibûn û di nav xelkê de belav dibûn, bi paş ve zîvirandin û vegerandin cihê wan. Bi vî awayî piştî sêzdeh sedsalan navê şerîetê mu‘cîzeyeke din jî nîşan da.

   Hem jî di wê înqilaba mezin de, dengê aliman û yê artêşê ev bû: “Meşrûtiyet xwe disipêre şerîetê.” Bi vê ramanê, wijdana temamê ehlê Îslamê hate îqnakirin û manyetîzmakirin. Wê înqilabê adetê înqilaban xira kir, bandûra şerîetê ya mu‘cîzane nîşan da û yê nîşan bide jî. Îtiraza min li fikra rojnameyên nîvê dawî yê Nîsanê heye: