Gelî birayên ku li vê Mizgevta Emewî li min guhdarî dikin û birayên misliman yên piştî çil-pêncî salî li mizgevta mezin ya alema Îslamê! Zenn nekin ku ji bo şîretan li we bikim ez derketime vî meqamê nesîhetê! Ez hatime vir, doza mafê me yî li cem we dikim. Yanî menfaet û bextewariya dinya û axretê ya taîfeyeke piçûk weke Kurdan, bi taîfeyên mezin yên mîna we mamosteyên Ereb û Tirkan ve girêdayî ye, lewra hûn serdest in.

   Bi kasûlî û sistîtiya we, em taîfeyên Îslamê ku birayên we yên piçûk in zirar dibînin.

   Bi taybetî jî gelî Erebên ku êdî hişyarbûneke mezin di nav we de çêbûye, yan jî yê çêbibe!

   Berî her tiştî ez bi van gotinan bi we re diaxivim: Lewra hûn ji me û temamê taîfeyên misliman re seyda, îmam û mucahidên Îslamiyetê ne. Paşî jî milletê mezin yê Tirk ji bo wê wezîfeya we ya pîroz tam alîkarî kirin. Loma jî bi kasûliyê hûn gunehekî mezin dikin; lê qenciya we jî pir mezin û bala ye. Bi taybetî jî em bi hêviyeke mezin ji rehma Xwedê hêvî dikin ku piştî çil-pêncî salî din, taîfeyên Ereban jî mîna Dewletên Yekbûyî yên Amerîkayê bikevin rewşeke baş û bala; desthilatiya Îslamê ya ku niha êsîr e, dîsa mîna berê li nîvê cîhanê, hetta li piraniya wê ava bikin. Eger di nêzîk de qiyametek ranebe, bi izna Xwedê nifşên ayendeyê wê vê bibînin.

   Birayên min, Qet nefikirin û xeyal nekin ku ez bi van gotinên xwe we tehrîk dikim da ku hûn bi siyasetê re elaqedar bibin. Haşa! Rastiya Îslamê di ser temamê siyasetan re ye. Siyaset hemî dikarin jê re bibin xizmetkar, lê ne heddê tu siyasetê ye ku Îslamiyetê ji xwe re bike alet.

   Ez bi vê têgihiştina xwe ya bi qusûr, jiyana civakî ya Îslamê di vê dema han de mîna fabrîqeyeke ku gelek çerx û dolabên wê hene, teswîr dikim. Eger çerxeke wê fabrîqeyê li paş bimîne, yan jî bikeve pêşiya çerxeke hevala xwe, mîhenga makînê xira dibe.

   Îcar tam dema yekîtiya Îslamê tê, divê hûn li qusûrên hev yên şexsî nenêrin.