Ha ji ber van xalan îttîfaqa bi wan re lazim e. Hem jî dijminên me yên ku em xilas kirine; cehalet axa, kurê wî feqîrî efendî û neviyê wî neyarî beg in. Eger Ermeniyan dijmintiya me kiribin, di bin qumandariya van hersê mufsidên şolxirab de kirine.

   Pirs: Hukûmeta Ermeniyan navbera me xira dike. Ermenî êrîşî me dikin, dibêjin; “Hurriyet û meşrûtiyet yên me ne, me kirin.” Me bêhêvî dikin.

   Bersiv: Bi gumana min êrîşkirina wan ji ber vê ye: Di xeyalên wan de hê wisa ye ku guya hûn êrîşî wan dikin, ew jî bi zirtên tolhildanê xwe rihet dikin. Hem jî ev tewra wan li hember gumana ku hûnê êrîşî wan bikin, xwenîşandan e. Eger bi temamî ji we ewle bibin ku hûnê êrîşî wan nekin, yê bi edaletê bawer bikin. Eger bi edaletê bawer nekin, yê edalet bi hêza heqiyê guhê wan bikişîne û wan îqna bike. Hem jî ew gotina wan ku dibêjin, “me meşrûtiyet bi dest xist” derew e. Hurriyet û meşrûtiyet bi sunguyên leşkerên me û bi qelema koma milletan derketin qada hebûnê. Daxwaza wan mirovên ku tiştên kelevajî digotin, siyaseta ademî merkeziyet ango ya ne-merkezî bû, ku ew jî dotmama begîtî û xwemuxtariyê ye. Ji bilî vê jî ji sedî nodê wan bûne peyrewên me. Ji sedî pêncê wan geveze ne, çendekên din jî teredîniyê dikin, dev ji xeyalên xwe yên kevin bernadin.

   Pirs: Qur’an hezkirina Cihû û Filehan qedexe dike:

لاَ تَتَّخِذُواْ الْيَهُودَ وَالنَّصَارَى أَوْلِيَاءَ

     Li gorî vê ayetê, tu yê çawa bibêjî, “bi wan re bibin dost?”

   Bersiv: Çawa ku divê metna delîlê bêguman be, wisa divê maneya wê jî bêguman be. Lê di vir de mecala şîrove û tewîlkirinê heye:

   Lewra nehya Qur’anê ne am e; mutleq e. Mutleq jî tê teqyîdkirin, ango tê sînorkirin. Zeman mufessirekî mezin e, eger sînorkirinê diyar bike, mirov nikare îtiraz bike. Hem jî dema hukim li ser tiştekî muşteq [tişta ku ji kokeke din çêbûye] be, jêdera çêbûna wê illeta hukim nîşan dide.