Pirsa we ya Sisêyan: Çima tu li hember siyaseta dinyayê ewqas bêdeng dimînî? Li hember vê sefaheta alemê tu qet tewra xwe naguherînî. Gelo tu wê normal dibînî, yan ji ber ku tu ditirsî, dengê xwe nakî?

   Bersiv: Xizmeta Qur’ana Hekîm bi şiddet men‘a min ji alema siyasetê kiriye. Hetta fikirîna li serê jî bi min daye jibîrkirin. Yan na, temamê jiyana min şahid e; eger bizanibim çûyina di rêyekê de heq e, tirsê tu carî bi destê min negirtiye û ez jê venegerandime û nikare min vegerîne jî.

(Mektubat: 67)

***

   Min dît ku di nav bizava siyasetê de, hem jî di nav dijberên wê de evîndarên Rîsaleyên Nûr hene. Dersên Qur’anê û nûra wê bi gelekî di ser bizavên siyasî û terefgiriyê re ne û ji têgihiştina wan ya xerezkarane, pak û bêrî ne. Loma jî divê tu aliyên ehlê siyasetê û tu beşên wê ji dersên Qur’anê û nûra wê şik û gumanan nekin û xwe jê venedin. Ji bilî şeytanên di şiklê mirovan de, yan jî heywanên di şiklê mirovan de ku bêdînî û zendîqiyê siyaset zenn bikin û terefdariya wê dikin...

   Elhemdulillah, bi xwedûrkirina ji siyasetê, min qîmeta rastiyên Qur’anê yên mîna elmasan, di bin gumana propagandaya siyasetê de danexist qîmeta parçeyên camê. Tam ‘eksê vê, her ku diçe ew elmas qîmeta xwe di çavê her taîfeyê de bi şiklekî eşkere zêde dikin.

(Mektubat: 69)

***

   Bingeha Pêncan: Ji şagirtên Rîsaleyên Nûr re destûreke bingehîn e ku heta mumkin be, têkilî karê siyaset û rêvebirinê nebin, îşê xwe ji xebatên hukûmetê neînin. Lewra xizmeta Qur’anê ya xalisane, hêjayî her tiştî ye û têra wan dike.

   Hem jî niha tu kesê ku bikeve siyasetê, di nav wan bizavên bi hêz de nikare serxwebûn û îxlasa xwe biparêze. Di her rewşê de wê bizavek tevgerên wî li ser navê xwe bide nîşandan û ji armancên xwe yên dinyayî re bike alet. Yê pîrozbûna wê xizmetê xira bike.