Siyaset-Polîtîka

   Nameya Şazdehan

   Ev Name bûye mezhera 

فَقُولَا لَهْ قَوْلاً لَيِّنًا

  loma jî nerm hatiye nivîsîn.

   Ev bersiva pirsekê ye ku hem manen, hem jî bi eşkereyî ji hêla gelek kesan ve tê pirsîn. Ev bersivdayin li xweşa min naçe û naxwazim. Min her tiştê xwe bi tewekkulî sipartibû Rebbê Alemê. Lê ji ber ku hinekan ez di halê min de rihet nehiştim û berê min dane dinyayê, ez jî ji mecbûrî bersivê didim, ne bi zimanê Seîdê Nû, lê bi zimanê Seîdê Berê. Ne ku ji bo ez şexsê xwe; bil‘eks ji bo ku ez dostên xwe û gotinên xwe ji guman û eziyetên ehlê dinyayê xilas bikim, dibêjim.

   Ezê rastiyê bi pênc xalan hem ji dostên xwe re û hem jî ji ehlê dinyayê û rêvebirên hukûmetê re beyan bikim:

   Xala Pêşîn

   Hatiye Gotin: Çima tu xwe ji siyasetê dûr dikî, qet nakevî nav?

   Bersiv: Seîdê Berê yê berî niha bi neh salan, hinekî kete nav siyasetê. Got belkî bi rêya siyasetê ji dîn û ilm re xizmetê bikim, lê beyhûde westiya. Dît ku ew rê bi guman û pirsgirêk e û ji min re hem fuzûlî ye, hem jî ji xizmeta lazim re asteng e; rêyeke bi xeter e. Di piraniya wê de derew hene û îhtimal heye ku mirov ji tiliya biyaniyan re jî bibe alet.

   Hem jî yê ku dikeve siyasetê; yan bi ser dikeve, yan jî dibe muxalif. Eger bikevim siyasetê û bi ser bikevim, madem ez ne memûr û mebûs im, naxwe siyasetvanî ji min re fuzûlî ye, ne lazim e. Îhtiyac bi min tune, ez beyhûde dikevim nav. Eger ez bikevim nav siyaseta muxalif, yan ezê bi fikra xwe yan jî bi hêza xwe bikevim nav. Eger fikren be, îhtiyac bi min tune, lewra her mesele eşkere bûye, herkes mîna min dizane.