Eger mirov behsa wan fitneyan bike, yê tiştekî wisa bête dilê mirov, ku mirov êdî li sehabiyên heqîqî yên mîna Telhe û Zubeyr jî ku ji eşereyên mubeşşere bûn, îtiraz bike. Eger şaşî hebe jî, îhtimala tobê pir e. Niha kesên ku bilfiîl derbên dijwar li Îslamiyetê dixin û musteheqê hezar lanet û nefretê ne, hene. Ne layiqê peywira pîroz ya zatekî bawermend û lêkolîner e, ku qet girîngiyê nede mirovên weha xirab, lê here zemanê sehabiyan, li ser tiştên bi zirar ku şerîetê emir nekirine, raweste.
Ez ji te venaşêrim; munaqeşeya te ya piçûk ku te bi Sebrî re kiribû, gelekî zirar daye Rîsaleyên Nûr û belavkirina rastiyên îmanê. Di eynî demê de, min li vir his kir; xemgîn bûm û pê êşiyam. Tu alimekî lêkolîner î, Sebrî jî hate wir, ev hatina wî dibû ku bibe wesîleya xizmeteke girîng. Min ji we dipa ku hûn xizmeteke Nûriye ya mezin bikin, lê mixabin min his kir û dît ku ji sê hêlan ve zirar daye Rîsaleyên Nûr. Piştî du-sê rojan min xeber sitand ku çima ev zirar çêbûye. Sebrî bi awayekî bêmane û bêluzûm bi te re munaqeşe kiriye, tu jî hêrs bûyî. Min got, heywax û min dua kir: “Ya Rebbî! Tu munaqeşeya van herdu zatên ku ji Erziromê hatine alîkariya min, veguherîne, bike feyde!”
Çawa ku di Lem‘eyên Îxlasê yên Rîsaleyên Nûr de jî hatiye gotin; niha divê ehlê îmanê ne tenê bi birayên xwe yên misliman re, belkî bi filehên dîndar re jî îttîfaq bikin û xalên ku dibin mijarên gengeşiyê deynin aliyekî, dev ji wan berdin. Lewra niha kufra mutleq êrîş dike.
Ez ji hemiyeta te ya dînî, tecrubeya te ya ilmî û elaqedariya te ya li ber Rîsaleyên Nûr rica dikim; wê munaqeşeya te bi Sebrî re kirî ji bîr bike, wî bibexşîne û lê helal bike. Lewra tiştên ku wî gotin ne fikrên wî bûne. Tiştên ku ji berê ve ji melayan bihîstine bi şiklekî nelazim bi te re munaqeşe kirine. Tu dizanî ku qenciyeke mezin ji gelek gunehan re dibe kefaret.
Belê, hemşehriyê me Sebrî bi rastî jî ji Rîsaleyên Nûr re û bi saya Rîsaleyên Nûr jî ji îmanê re xizmeteke wisa kiriye ku hezar qusûrên wî jî hebin, wan dide efûkirin. Divê tu jî, ji camêriya xwe û ji bo xatirê xizmeta Rîsaleyên Nûr, bi çavê hemşehrî û hevalekî xizmeta Rîsaleyên Nûr lê binêrî.
