Serhildana Şêx Seîd

   Bersiva Pirseke Girîng e

   Ji memûrên mezin yên ku bi me re elaqedar dibûn pirsîn:

   “Mustefa Kemal sêsed lîra meaş teklîfî te kir ku te di şûna Şeyx Sunûsî* de li Kurdistanê û Bajarên Rojhilat bike waizê giştî. Çima te qebûl nekir? Eger te qebûl bikira, te yê canê sed hezar Kurdên ku ji ber serhildanê hatin serjêkirin xilas bikira.”

   Min jî di bersiva wan de got: Min jiyana dinyayê ya bîst-sîsalî ya sed hezar mirovî xilas nekiriye, rast e. Lê di bedêla wê de Rîsaleyên Nûr zirareke hezar qatî ji wê zirarê mezintir ji holê rakiriye; ji sedhezarên hemwelatiyan re bûye wesîle ku jiyana milyonsalane bi dest xistine. Eger min ew teklîf qebûl bikira, yê Rîsaleyên Nûr ku ji tu tiştî re nabin alet, nabin peyrewê tu tiştî û ji sirra îxlasê venaqetin, nehatana çêkirin.

   Hetta, min li hebsê ji birayên xwe yên qedirhêja re gotibû:

   Eger ew zatên ku ji ber şeqamên tûj yên Rîsaleyên Nûr -ku şandibûn Enqerayê- ez mehkûmî îdamê kirim, bi Rîsaleyên Nûr îmana xwe xilas bikin û ji îdama ebedî rizgar bibin, hûn şahid bin ku ez bi rûh û can heqê xwe li wan jî helal dikim.

(Şualar: 338)

***

   Berî niha bi diwazeh salan serekên Enqerayê, keda min ya ku min di berhema xwe Xutuwatê Sitte de li hember Îngilîzan dayî, teqdîr kirin û ez vexwendim wê derê. Ez çûm. Rewşa wan ne li gorî hestên min yên extiyariyê bû.

   Ji min re gotin:

   -Bi me re bixebite.