Çawa ku piştî vê zivistanê bihar tê, em jî ji adetê xwedê û rehma îlahî hêvî dikin ku Mehdî jî wisa bê. Di vê libendêmayina xwe de em mafdar in jî.

   Cemiyeta nûranî ya Hz. Mehdî yê rejîma xirabkar û bide‘tkarane ya Sufyan tamîr bike û sunneta seniyye vejîne. Yanî qomîteya Sufyan ku bi niyeta înkarkirina pêxemberiya Pêxember (e.s.w.) dixwaze şerîeta Ehmedî (e.s.w.) xirab bike, yê bi şûrê manewî û mu‘cîzekar yê cemiyeta Hz.Mehdî bête kuştin û belawelakirin.

   Hem jî komîteya Deccal ku di nav mirovan de bi niyeta înkarkirina xwedatiyê şaristaniyê û muqeddesatên mirovan talan dike, yê ji hêla cemiyeteke di bin serektiya Îsa (e.) de were kuştin û mirovê ji înkarkirina xwedatiyê xilas bibin. Ew cemaeta bi navê cemaeteke Îsewî, ya hemiyetkar û fedakar, layiqê navê “Mislimanên Îsewî” ye û dixebite ku dînê heqîqî yê Îsa (e.) bi rastiyên Îslamê re bike yek.

   Ev sirra girîng pir dirêj e. Ji ber ku me li cihên din hinekî behsa wê kiriye, bila li vir ev îşaretên kin bes bin.

(Mektubat: 591-594)

***

   Şaşiya Dehan: Di eynî rûpelê de gotine: “Derbarê du cûreyên deccal û sufyan de ku ne ji zerûretên dînî ne, dibêje ku îcma li ser wan heye. Kesên ku bawer nakin wan dike zendîq, bêdîn û mulhid. Lê tiştên mîna mehdî, deccal û sufyan ji xwe hem di Qur’anê de nîn in, hem jî îcma li ser wan tune. Tenê Teftazanî gotiye; ‘Ji ber ku ev ne tiştên nemumkin in, em hedîsên di vî warî de hatine rîwayetkirin qebûl dikin.’ Wekî din jî, jixwe Ehlê Sunnetê îttîfaq kirine ku Îmamê Veşartî û Mehdiyê Muntezer batil in.”

   Bersiv: Em layiqê wan zatan nabînin ku kîtabên ji sed rîsaleyî zêdetir tedqîq nekirine, lez kirine û tenê bi awayekî sethî hukmekî weha ji îbareyê rîsaleyeke mehrem derxistine.