اَللّٰهُمَّ صَلِّ عَلٰى سَيِّدِنَا مُحَمَّدٍ وَعَلٰۤى اٰلِ سَيِّدِنَا مُحَمَّدٍ كَمَا صَلَّيْتَ عَلٰۤى اِبْرَاهِيمَ وَعَلٰۤى اٰلِ اِبْرَاهِيمَ فِى الْعَالَمِينَ اِنَّكَ حَمِيدٌ مَجِيدٌ

Bîlmuşahede hatiye qebûlkirin ku alê Muhemmed (e.s.w.) mîna alê Îbrahîm (e.s.w.) gihatine rewşeke wisa ku her demê û li her cihî, di serê wan silsîle û rêzên mubarek de zatên nûranî hene û ji wan re qumandariyê dikin. ^(Haşiye)  Ew qumandar ewqas pir in ku bi tena serê xwe artêşek in. Eger bikevin şiklê maddî, bi hikmeta desthevgirtinê bibin yek tîme, dînê Îslamê ji xwe re weke milliyeta pîroz bibînin, bikin benda yekîtî û hişyariyê, hingê artêşa tu milletî nikare li hember wan bisekine. Ha ew artêşa pir û bi hêz alê Muhemmed (e.s.w.) in û artêşa herî taybetî ya Hz. Mehdî ye.

   Belê, îro di dîroka dinyayê de tu nesleke mîna nesla seyyidên Alê Beytê bi hêz û girîng tune; ku bi rîwayet, şecere û senedan bi hev ve girêdayî; ji hêla şerefa bala, alînijadî û neseba esîl ve mîna wan bijarte be. Ji zemanên berê ve yên ku li li pêşiya firqeyên ehlê heqîqetê ne, ew in û serekên navdar yên ehlê kemalê jî dîsa ew in. Niha jî ew neseleke mubarek in ku jimara wan ji milyonan jî zêde ye. Ew hişyar in, dilê wan ji îmanê û hezkirina pêxemberî tije ye. Ew bi şerefa neseba xwe ku hêjayî dinyayê ye serfiraz in.

   Bûyerên mezin çêdibin ku hêza pîroz ya cemaeteke weha mezin hişyar dikin û wê tînin heyecanê. Helbet yê ew xîreta bala ya wê hêza mezin bipijiqe û Hz. Mehdî jî yê biçe ser serê wan û wan bi bal rêya heq û heqîqetê ve biajo.