Bersiveke pir kin ya pirseke gelekî girîng e.

   Pirs: Gelek rîwayetên sehîh hene ku dibêjin di axirzeman de Hz. Mehdî tê û alema ku ketiye nav xirabiyê îslah dike. Lê ev zemanê han zemanê cemaetê ye, ne zemanê şexsan. Şexs çiqas dahî, hetta sed dahî be jî, eger ne niwênerê cemaetekê be, şexsê manewî yê cemaetekê temsîl neke, yê li hember şexsê manewî yê cemateke dijber mexlûb bibe. Vî zemanî hêza welîtiya wî çiqasî mezin jî be bila bibe, ma yê çawa cemaeta mirovan ku di nav xirabiyeke mezin de ye îslah bike? Eger hemî karên Mehdî ji adetê der bin, yê muxalifî hikmeta Îlahî û qanûnên adetê Xwedê yên dinyayê be. Em dixwazin sirra vê meseleya Mehdî fêhm bikin.

   Bersiv: Her dema ku ummeta Îslamê ketiye fesadê û tengasî dîtiye, Rebbê Alemê ji kemala rehmeta xwe, ji bo ku şerîeta Îslamê baqî bimîne; îslahkerek, yan nûkerek, yan xelîfeyekî zîşan, yan qutbekî e‘zem, yan murşidekî ekmel û yan jî zatên mubarek ku di hukmê mehdiyekî de ne, weke nîşana parastinê şandine. Wan jî ew fesad ji holê rakirine, millet îslah kirine û dînê Ehmediye (e.s.w.) parastine.

   Madem adetê Xwedê weha dewam dike, helbet yê di dema fesada mezin ya axirzeman de jî zatekî nûranî weke muctehidekî herî mezin, hem hakim, hem mehdî, hem murşid û hem jî qutbekî e‘zem bişîne. Ew zat yê ji ehlê beyta Pêxember be. Çawa ku Rebbê Alemê di deqîqeyekê de navbera erd û ezman bi ewran tije dike û vala dike, wisa jî di sayineyekê de firtoneyên behrê radiwestîne. Ew Qedîrê Zulcelal ku di biharê de, saetekê numûneya havînê nîşan dide û di havînê de jî saetekê numûneya firtoneya zivistanê nîşan dide; dikare wê tarîtiya li ser alema Îslamê bi Mehdî belav bike. Ji xwe wî soz daye û helbet yê soza bîne cih jî.

   Eger mirov ji aliyê qudreta îlahî ve lê binêre, pir hêsan e. Eger mirov di çarçeveya sebeban û hikmeta Xwedê de bifikire, dîsa jî ev tiştekî maqûl û muqabilê bûyinê ye ku ehlê tefekkurê jî wisa hukim kirine: “Eger rîwayetek ji wî Muxbirê Sadiq tunebe jî, divê wisa be û yê wisa bibe jî.” Êdî hemd ji Xwedê re ku temamê ummetê rojê pênc caran vê duaya han di temamê nimêjên xwe de tekrar dikin: