Ya Çaran: Ji berê ve gelek zatan seydayê xwe, murşidê xwe, mamosteyê xwe, yan jî serekê xwe ji heddê wan çêtir dîtine û mezintir kirine. Ji ber ku wan seydayan jî ders dane wan zatan û ji îrşada wan re bûne wesîle, ew husn-u zena wan hinekî qebûl kirine. Digel ku ev husn-u zena wan muxalifê rastiyê bûye jî, ji ber vê hikmetê rexne lê nehatiye kirin.
Niha şagirtên Rîsaleyên Nûr bi çavê seydayekî bi fezîlet, li mertebeyeke bala û layiqê wan, li minê bêçare û bi qusûr dinêrin. Ji bo ku eşq û şewqa wan ya xebatê neyê şikestin, ev husn-u zena wan ya derbarê min de dikare bête qebûlkirin. Lê divê bête zanîn ku ew weke malê şexsê manewî yê Rîsaleyên Nûr di destê min de ne. Hem jî di serî de kesên zendîq, ehlê jirêketinê, yê siyasetê, yê xefletê û hetta ehlê dilsaf yên diyanetê jî, ji ber ku zêde qîmet didin şexsan neheq in. Bi zorbirina min dixwazin derbê li heqîqetê bixin. Ji wan were ku rebenekî weke min çavkaniya wan Nûran e, loma jî ji bo ku min têk bibin û wan Nûran vemirînin tişta ji wan tê, texsîr nakin. Hetta, dixebitin ku kesên dilsaf jî ji wan bawer bikin. Di Meseleya Duduyan de bûyerek vê heqîqetê nîşan dide.
(Emirdağ Lahikası: 50-52)
***
Birayên ezîz û rast,
Dibêjin: Çima tu meqam û kemalatên ku şagirtên Rîsaleyên Nûr ji te hêvî dikin û wisa qenaet dikin qebûl nakî? Qebûlkirina wan yê eşq û şewqa şagirtan zêde bike. Lê tu hemiyî dikî malê Rîsaleyên Nûr û xwe weke xizmetkarekî pir bi qusûr nîşan didî. Sebebê vê çi ye?
Bersiv: Hemd û senayên bêjimar ji Xwedê re bin ku Rîsaleyên Nûr xwe dispêre tiştên bi hêz ku li ber tu tiştî nahejin. Delîlên wê ewqas eşkere û bêguman in ku pêdiviya wê bi taybetmendiyên ku xelk ji min hêvî dikin tune. Rîsaleyên Nûr mîna berhemên din, hêz û meqbûlbûna wê ne ji nivîskarê wê ye. Her tişt li holê ye. Ew xwe dispêre delîlên vebirî. Ev bîst sal in ku Rîsaleyên Nûr dijminên şexsê min yên maddî û manewî mecbûrî teslîmbûnê dike. Eger şexsiyeta min jê re xwesipartineke girîng bûna, dijminên min yên bêdîn û dijberên min yên bêînsaf yê bi çirûkkirina şexsê min derbeyên mezin li Rîsaleyên Nûr bixistana.
