Di vê sedsala ecêb de, li hember van nexweşiyên wê yên dijwar Rîsaleyên Nûr -ku dermanên tiryakmîsal yên Qur’ana Muczizu’l-Beyan belav dike- û şagirtên wê yên berxwedêr, rast û durust, xalis û muxlis dikarin rabin. Naxwe berî her tiştî divê mirov bikeve nav daîreya Rîsaleyên Nûr; bi sedaqet, metanet, bi îxlaseke ciddî û baweriyeke tam pê bigire da ku mirov ji bandûra wê nexweşiyê rizgar bibe.

   Em yeko yeko silavan li temamê birayên xwe dikin û ji wan re dua dikin.

(Kastamonu Lahikası: 108-109)

***

   Mehdî, Deccal (Sufyan)

   Sê peywirên şexsê manewî yên cemaeta pîroz ku Mehdiyê Alê Pêxember temsîl dike hene. Eger qiyamet ranebe û însan bi temamî ji rê dernekevin, em ji rehmeta îlahî hêvî dikin ku peyrewên Mehdî û civata seyidan wê peywirê bikin. Sê peywirên mezin yên wê civatê hene:

   Peywira Pêşîn: Bi serdestiya zanistên nû û felsefê nexweşiya materyalîst û xwezayiyan di nav mirovan de belav bûye. Ev peywir wê berî her tiştî ramana wan bide sekinandin, fikrê wan pûç bike û îmanê ji gumanan xilas bike. Ji bo ku ehlê îmanê ji jirêketinê bêne parastin, divê dinya û her tiştê din bêne terkkirin. Gelek caran jî jê re lêkolîn û meşxûliyet divê, loma jî Hz. Mehdî wext nabîne ku peywirê bi cih bîne û ji xwe rewş jî wê derfetê nade. Karê serweriya xîlafeta Muhemmediye (e.s.w.) wext nabîne ku pê re mijûl bibe. Bi texmîna min yê komeke din wê peywirê bîne cih. Ew zat jî yê berhema ku bi lêkolîneke dûr û dirêj hatiye nivîsîn ji xwe re bike bernameyek. Bi wê bernameyê yê wezîfeya xwe ya pêşîn bi temamî bîne cih. Artêş û hêza manewî ku ev peywir pişta xwe dide wan tenê şagirtên xwediyê îxlas, sedaqet û desthevgirtina tam in. Ew şagirt çiqas hindik bin jî, bi qasî artêşekê bi hêz in û hêja ne.