Eger ku salih bin, belkî di axretê de jê re şefaetê bikin. Ji ber ku ji deh jinan heşt jê tiştekî weha nabînin, divê ew reben heta ku mecbûr nebin, bi wê meyla fitrî û şewqa nefsanî nekevin jiyaneke weha zehmet.

   Ha ji ber vê rastiya han ez ji keçên ku şagirtên Rîsaleyên Nûr in re dibêjim:

   Heta ku hûn yekî hemkûf, dîndar û bi xelaq nebînin, bi xwetazîkirinê xwe nefiroşin. Eger peyda nebû, weke hinek şagirtên Rîsaleyên Nûr yên fedakar bi tenê bimînin, heta ku muşteriyekî bi wijdan û layiqî we ku perwerdeyeke Îslamî dîtiye û di jiyana ebedî de jî bi we re bibe heval derkeve, sebir bikin. Bila bextewariya we ya ebedî ji bo keyfa dinyayê ya muweqqet wêran nebe û xwe di nav gunehên medeniyetê de nexeniqînin. Haşiye: Xwişk û keçên ciwan bila Rîsaleya Tesetturê bixwînin.

(Emirdağ Lahikası: 330-331)

***

   Wesiyetnameya Min e Bira û warisên min yên ezîz û rast,

   Ji ber ku ecel veşartî ye nivîsandina wesiyetnameyê sunnet e. Di serî de ji Xusrew û Tahirî re, ji her diwazdeh^(Haşiye) birayên qehreman yên wê desteya Nûrê û gulê re wesiyet dikim: Metrûkeya min, kîtabên min yên Rîsaleyên Nûr yên xusûsî, berhemên rindcildkirî û temamê tiştên min yên din... Ez hemiyan li hêviya wan dihêlim. Wexta bi emrê Xwedê ecelê min hat, bila wê metrûkeya min bi wan destên rast û mubarek di şûna min de, di xizmeta Nûriye û îmaniye de bixebitîn.

   Birayên min! Ji vê rewşa han netirsin. Ji ber kul û xeman û ji ber jehrkirina neh caran û ji ber çend sûîqesd û hîleyên munafiqên veşartî -çendî ku qels in jî- min ev wesiyet nivîsî. Meraq nekin, alîkariya Xwedê û parastina wî berdewam in.

(Emirdağ Lahikası: 88-89)

***