Selaheddîn mijareke xwe ya taybetî dipirse. Dixwaze dest bavêje dinyayê û jiyana civakî. Madem ew di nav mirovên taybet de ye, eger zirara wê ji xizmeta Rîsaleyên Nûr re hebe, qet‘iyyen bila nekeviyê. Heke bizanibe û weke hinek birayên taybet hevjîna xwe weke alîkar di xizmeta Rîsaleyên Nûr de bixebitîne, dikare bikeve wê jiyanê. Lewra jiyana mirovên taybet aîdê Rîsaleyên Nûr e û bi munasibdîtina şagirtên ku şexsê manewî yê Rîsaleyên Nûr temsîl dikin hatiye qeyd û zebt kirin. Eger bi gotina dewbavên wî jî be, înşaellah zirara wê tune.

(Emirdağ Lahikası: 59)

***

(Ev mijar mehrem e. Tenê ji bo endamên Medresetu’z-Zehrayê ye.)

Ji Jinên Extiyar re Mizgîniyeke Girîng, ji Keçên Ezeb

û yên ku Dixwazin bi Tenê Bimînen re Hişyariyek e

Hedîsa pîroz 

عَلَيْكُمْ بِدِينِ الْعَجَۤائِزِ

     nîşan dide ku di axirzeman de îmana bihêz bi jinên extiyar re dimîne, loma ferman dike, dibêje: “Li pey dînê jinên extiyarên dîndar herin.”

Yek ji çar esasên Rîsaleyên Nûr şefqet e. Îcar jin jî lehengên şefqetê ne, jina herî tirsonek jî ji bo zaroka xwe bi qehremanî canê xwe feda dike. Niha ew dê û xwişkên hêja bi bûyereke mezin re rû bi rû ne. Hişyariyek hate rûhê min ku ji keçikên şagirtên Rîsaleyên Nûr yên ku dixwazin, yan jî mecbûr mane bi tenê bimînin re beyan bikim. Ez dibêjim:

Keç û xwişkên min! Ev zeman ne mîna zemanê berê ye. Ji ber ku ev nîv-sedsal e perwerdeya medenî di şûna perwerdeya Îslamî de, di jiyana me ya civakî de cih girtiye; lazim e mêrek jinekê weke hevjîna ebedî û navgîna bextewariya jiyana dinyayê ji xwe re bistîne û xwe ji gunehên din biparêze.