Îşareta Sisêyan:
Welayet delîleke pêxemberiyê; terîqet jî delîleke şerîetê ye. Lewra ew rastiyên îmanê ku pêxemberiyê ew teblîx kirine, welayet bi dîtina dil û bi zewqeke rûhanî, eynî mîna ku bi rastî jî dîtibe, bi wan bawer dike û wan rast didêrîne. Ev rastdêrandina wê ji rastiya pêxemberiyê re delîleke verbirrî ye. Şerîet bi hukmên xwe dersa rastiyê dide. Terîqet jî bi zewq û keşfa xwe, bi îstîfadekirin û feyzsitandinê delîleke eşkere ye ku hukmên şerîetê ji cem Xwedê hatine û heq in.
Belê, çawa ku welayet û terîqet delîl û nîşanên pêxemberî û şerîetê ne; eynî wisa ji Îslamiyetê re jî yek ji sirr û hikmetên mukemmelbûnê û wesîleyek ji yên ronahiyê ne. Ew ji mirovahiyê re jî bi saya Îslamê çavkaniya pêşveçûnê, jêdera feyz û bereketê ne.
Digel van hikmetên mezin û evqas girîng jî, hinek firqeyên jirêketî înkara hebûna terîqetê kirine. Ew ji wê nûr û ronahiyê mehrûm mane û bûne sebeb ku xelk jî jê bêpar bimînin. Xala ku mirov herî pir pê xemgîn dibe ev e: Di nav ehlê sunnet û cemaetê de, hinek alimên zahirî û hinek jî ji ehlê siyasetê ku xafil in, hinek şaşî û sûîîstîmalên ehlê terîqetê dikin hêncet û dixwazin wê xezîneya mezin bigirin û xira bikin, wê kaniya kewserê ku ava heyatê dibexşîne ziwa bikin. Ya rast ev e ku di nav pîşe û meşreban de yên bêqusûr û bi her awayên xwe baş hindik peyda dibin. Yanî bivê-nevê yê hinek qusûr û xirabbikaranîn çêbibin. Lewra dema kesên neehl dikevin nav karekî helbet wî karî xirab bi kar tînin. Lê Rebbê Alemê li axretê li gorî destûra hesabkirina amelê mirovan, edaleta xwe ya rebbanî li gorî pîvandina qencî û xirabiyan nîşan dide. Yanî, eger qencî pirtir bin, mukafata wê dide; eger xirabî girantir bin jî cizayê wê dide. Pîvandina qencî û xirabiyê ne li gorî çiqasbûnê ye, li gorî çawabûnê ye. Carna dibe ku qenciyeke tenê hezar xirabiyî berteref bike û bide efûkirin.
Madem edaleta îlahî weha hukim dike û heqîqet jî vê rast dibîne, êdî delîla ku qenciyên terîqeta di çarçeveya sunneta pak de ji xirabiyên wê pirtir in ev e ku di dema êrîşên ehlê jirêketinê de jî ehlê terîqetê îmana xwe parastine.
