Îxlas, durustî û berxwedana we têrê dike ku ku hûn di van şert û mercên giran de sebrê bikin û li qusûra hev nenêrin. Biratiya bi hêz ya ku bi zincîra Rîsaleyên Nûr çêdibe qenciyeke wisa ye ku hezar gunehî jî dide efûkirin. Hûn dizanin ku di heşrê de xêr ji gunehan girantir tên û wan didin efûkirin. Naxwe hûn jî li gorî girantirbûn û serkeftina xêran, bi hezkirin û bexşandinê tevbigerin. Yan na, eger mirov ji ber xirabiyekê yan jî ji ber hessasbûn û bêhntengbûnê aciz bibe û hêrs bibe, ev ji du aliyan ve dibe zilm. Înşaellah hûnê di xweşî û teselliyê de alîkariya hev bikin û rê nedin aciziyê.
(Şualar: 414-415)
***
Birayên Ezîz û Rast, Hevalên Xalis yên
Xizmeta Qur’an û Îmanê!
Dema jihevcudabûna me nêzîk bûye. Ji ber kêmasî û aciziya ku ji vê rewşa zehmet çêdibin, destûrên di Rîsaleya Îxlasê de nayêne parastin. Loma jî em mecbûr in ku li hev helal bikin. Hûn ji birayên ji dêwbav, yên herî fedakar jî pirtir birayên hev in. Bira qusûra bira vedişêre, jibîr dike û efû dike. Ez vê îxtîlafa we ya ku nedihat payin, nakim para nefsa emmare û wê layiqê şagirtên Rîsaleyên Nûr nabînim. Weliyên ku nefsa emmareya xwe terk dikin jî, muweqqeten hinek ezîtî bi wan re dimîne. Ez wisa dibînim. Hûn jî bi israr vê husn-u zenna min boş dernexin, li hev werin.
(Şualar: 436)
***
Birayên ezîz û rast!
Li vê dinyayê û di vî zemanî de; xusûsen ji kesên ku dikevin nav belayan re û bi taybetî jî ji van zehmetiyên dijwar û bêhêvîbûna şagirtên Rîsaleyên Nûr re, çareya herî bi bandûr ew e ku mirov hev tesellî bike, dilê hev xweş bike. Divê mirov quwweta hev ya manewî zêde bike û mîna birayên heqîqî û fedakar, xem û huznên hev derman bike û bi dilovaniyeke mezin dilê xemgîn şad bike.
