Hem jî zemanê berê hinek serekan cesareta millî ku xîreta millet diparêze xirab bikar anîn, avêtin qûmistana cihê dijîtiyê, telef kirin. Heryekî ji wan qewlikekî wê hêzê li stûyê yên din dan û şikandin. Hetta wan dikaribû bi pênsed hezar qehremanî xîreta millet biparêzin, lê wan ew hêza mezin di nav xwe de badîhewa kir; di warê dijberiyê de xerc kir û li dijî hev bikar anîn, loma jî xwe musteheqê terbiyeyê kirin.
Eger hûn dixwazin ji meşrûtiyetê îstîfade bikin, wan qulan bigirin, wî cihî bikin mêrg û kanî û wê hêzê jî bidin destê dewleta me da ku wê li derve bixebitîne. Hingê hûnê rehmê li dêwbavên xwe bikin û edalet û şaristaniyê bi dest bixin.
-Eger hûn bixwazin, em cihê xwe biguherînin. Ez bipirsim û hûn bersivê bidin.
Bersiv:
فَاسْاَلْ وَلاَ تَجِدْ بِهِ خَبِيراً
Pirs: (Haşiye) Gelo dibe ku gelê Ermenî ji we mêrtir be?
Bersiv: Nexêr, na! Dinya-alem şahid e ku nebûne û nabin jî.
Pirs: Naxwe çima dema ku fedaiyekî wan bişewitanda, parçe-parçe jî bikirana, sirra xwe nedida der û hevalên xwe eşkere nedikirin? Lê ya we, eger kêrekê li mêrekî we bixin, yê temamê sirrên xwe bi xwîna xwe re bide der. Ev jî nakokiyeke mezin e, gelo sebebê wê çi ye?
Bersiv: Em nikarin sebebê wê yê eslî teşxîs bikin. Lê em dizanin tiştek heye ku zerreyê dike çiya û şêr jî ji rovî re dike xulam. Ji me nayê ku em peywira te bikin. Me hebûna wê zanî, mahiyeta wê jî tu rave bike.
Bersiv: Madem wisa ye guhdarî bikin guhên xwe tam vebikin. Himmeta Ermeniyekî ku bi fikrê milliyetê hişyar bûye, temamê gelê wî ye.
