Di bin vê gumana han de ew heqîqetên ku ew belav bikin, yê rewaca wan bikeve, pir neyên qebûlkirin. Eger feydeya van heqîqetan ji belavkerê wan û meqamê wî re yek be, ji xelkê re zirara wê hezar e.
Welhasil: Îxlas min ji tiştên ku bibin wesîleyên şan û şerefê, rutbeyên maddî û manewî dûr dike. Gerçî zirara vê yê pir bide xizmeta Rîsaleyên Nûr, lê ji ber ku “çiqasbûn” li gorî “çawabûn”ê bêqîmet e, ne xema min e. Ez wisa dibînim ku mirov wek xizmetkarekî xalis heqîqetên îmanê ku ji her tiştî balatir in, ji deh mirovan re bibêje, ji qutbîtiyeke mezin ku hezar mirovî îrşad dike çêtir e. Lewra ji ber ku ew deh mirov wê heqîqeta tam ji her tiştî biqîmettir dibînin yê sebat bikin. Ew dilê wan ku weke sîsikan e her yek ji wan dikare bibe darek. Lê ew hezar mirovên din yê li dersên wî qutbî bi şik û gumanên ku ji felsefe û dinyayê tên binêrin û bibêjin: “Ev tiştên ku dibêje ji meqamê wî yê taybetî û ji hissên wî yên xusûsî tên.” Mumkin e ku mexlûb bibin û belav bibin. Ha ji ber vê wateya han ez xizmetkariyê tercîhî meqaman dikim.
(Emirdağ Lahikası: 54-55)
***
Birayên ezîz û rast,
Peri her tiştî: Min nîqaşeke xerîb bi nefsa xwe re kir. Ev tiştekî taybetî ye, bi nefsa min re elaqedar e, lê hate bîra min ku bila haya we jî jê hebe:
Lewheya li ser serê min ewa ku hûn dizanin digel ku tam ez disekinandim jî, lê hissiyatên min yên kor ku wê şevê biisrartir çeka nefsa emmare bi kar dianîn, pir ez aciz dikirim. Ji ber jehrdayin û nexweşiyê ez bêhal bûm û di bin wê tesîrê de gelekî xemgîn bûm. Rewşeke ecêb bi min re çêbûbû, êşeke dijwar ez vegirtibûm. Îhtîmala mirinê û bêhêvîbûnê ez aciz dikirim. Bi gotinên şeytan û hezkirina dinyayê ya fitrî, ew hestên kor ku di hukmê nefsa emmare ya duyem de ne bi hirs, zewq û lezzet xwe gihandin dil û rûhê min û ji min re gotin: “Çima tu ji rihetiya jiyana xwe re naxebitî, hetta tu wê red dikî? Çima di daîreya Rîsaleyên Nûr de ji xwe re li jiyaneke bikeyf, bêguneh û bilezzet nagerî, lê te biryar ji bo mirinê daye û pê razî dibî?” Ji nişka ve du heqîqetên pir bihêz ew nefsa emmareya duyemîn û şeytan sekinandin:
