Heryek ji we ji milletê xwe re bibe neynika jiyana wan, bibe parêzvan û muhafizê bextewariya wan û ji temamê wan re bibe mîsaleke muşexxes. Hingê hûnê ne bi qasî mirovekî, bi qasî milletekî mezin bibin. Lewra bi mezinbûna armancê himmet jî zêde dibe û bi xeleyana hemiyeta millî exlaq jî dikemile û pêş ve diçe.

(İçtimaî Dersler, İki Mekteb-i Musibetin Şehadetnamesi: 189)

***

   Pirs: Emê çawa hêza xwe bicivînin û şerefa millî biparêzin?

   Bersiv: Bi fikrê milliyetê hewzekî marîfet û hezkirinê yê weke hewzê Kewserê di nav millet de çêbikin. Wan qulê binê wî hewzî ku avê berdidin bi marîfetê bigirin. Coyên li jor yên ku av dê di wan re derbas bibe bi fezîleta Îslamê vebikin. Kaniyeke mezin heye, heta niha ji ber xirabbikaranînê diherikî şoristanê, parsekî û nekarî zêde dikirin. Coyeke xweşik ji vê kaniyê re vekin û bi xebata şer‘î berê wê bidin wî hewzî. Paşî jî bexçeyê xwe yê fezîlet û qenciyê av bidin. Ev çavkaniyeke bêdawî ye, qet naçike.

(İçtimaî Dersler, Münazarat: 122-127)

***

   Ez wisa bawer im ku pîroziya xizmetê û zewq û şewqa xebata wê ji heqî wê pirsgirêka tûj û xusûsî derdikevin û zora wê dibin. Heta ku ji te bê, divê tu guh nediyê. Dikandarê xwediyê malekî biqîmet û bêqusûr ne muhtac e ku lavelavê ji muşteriyan bike. Eger aqilê muşterî hebe bila ew lavelavê bike. Li gorî sirra

خَيْرُ الْاُمُورِ اَحْمَزُهاَ

  pirsgirêkên xêrên mezin pir in. Çiqas ku pirsgirêk zêde bibin jî divê ehlê himmetê sist nebin, xebat û sebata xwe zêde bikin. Înşaellah hûn jî ji wan kesên bisebir û bisebat in.

(Barla Lahikası: 82-83)

***