Birayên hêja, zeka û tevdîra we pêdiviyê nahêle ku ez derbarê desthevgirtinê de şîretan li we bikim. Lê vê dawiyê ez pê hesiyam, ji bo ku zirarê bidin vê hevkariya we, niyeteke xirab di nav we de, li dijî hevalê we çêdikin da ku hûn bikevin şik û gumanê. Belkî ji bo ku we ji hev parçe bikin, dibêjin, “Filan şagirt ji me re casûstiyê dike.” Diqqet bikin, eger hûn bi çavê xwe jî bibînin, wê perdeyê nedirînin. Li hember xirabiyê bi qenciyê bersiv bidin. Bi tevdîr bin, sirran nebêjin. Jixwe sirrê me tunin jî, lê kesên niyetxirab pir in. Eger tiştekî weha bibe jî, şagirtek ji wan re casûstiyê bike jî, bixebitin ku hûn wî rast bikin, perdeyê nedirînin.

(Emirdağ Lahikası: 77)

***

   Birayên hêja! Gelekî bi îhtiyat bin û pir diqqet bikin. Eman bi melayan re nîqaşê nekin. Heta ku mumkin be, bi awayekî aştîxwaz tevbigerin. Têkilî ezîtiya tu kesî nebin. Eger terefdarê bid‘eyan bin jî, nêzîkî wan nebin. Dema ku zendîqekî dijwar hebe, divê mirov bi ehlê bid‘eyan re nelebike û wan neajo aliyê bêdînan. Eger hûn rastî melayên ku ji bo nîqaşa bi we re hatine şandin bibin, heta ku mumkin be deriyê nîqaşê venekin. Îtirazên wan yên di bin cil û bergên ilmê de, yê ji munafiqan re bibin sened. Hûn dizanin bê êrîşa wî melayê extiyar li Stenbolê çiqasî zirar da. Heta ji destê we tê, [îtirazan] ji bo aliyê Rîsaleyên Nûr tewîl bikin.

(Emirdağ Lahikası: 88)

***

   Her çiqas ku Rîsaleyên Nûr herin kîjan cihî li wir bi ser dikevin jî, lê hinek zendîqên di kufrê de bi rik û materyalîst ji bo ku belavbûna Rîsaleyan sist bikin, heta ji wan tê dest davêjin hîleyan û dixwazin şik û gumanê bi ehlê siyasetê re çêbikin. Bi izna Xedê ew nikarin tu tiştî bikin, lê dîsa jî tevdîr hertim baş e. Destûra sirren tenewweret ango ji dizî ve ronî kir, belav bû û dewam dike. Heta ku mîna vê çend Rîsaleyên din jî derkevin, semax û îhtiyat lazim e.