Berhemeke Bedîuzzeman ya bi navê Rêbera Xizmetê tune. Piştî wefata wî ji hêla şagirtên wî ve kîtabeke bi vî rengî hatiye amadekirin. Rêbera Xizmetê ya ku Weşanxaneya Zehrayê amade kiriye, li gorî pêdiviyên zeman, yeke berfirehtir û mezintir e. Herweha ev berhem weke kurtebêjiyeke Rîsaleyên Nûr e jî, mirov bi vê berhemê ji fikr û ramana Bedîuzzeman Seîdê Kurdî agahdar dibe. Kesê ku derbarê mijarekê de agahiyên firehtir bixwaze dikare li çavkaniyên ku di kîtabê de hatine dayin mêze bike.

   Rêbera Xizmetê ji çar beşên sereke pêk tê.

   Beşa Pêşîn îşaretî bi bal çavkanî û mijarên bingehîn yên Rîsaleyên Nûr ve dike.

   Beşa Duduyan bi çavê Rîsaleyên Nûr qala Îslamê û îbadet dike.

   Beşa Sisêyan behsa mijarên bingehînê yên Rîsaleyên Nûr, rastiya wan û metod û modela xizmetê ku mijara bingehîn e dike.

   Beşa Çaran jî hinek metnên bijarte ne ku ji Kulliyata Rîsaleyên Nûr hatine hilbijartin.

   Divê bê gotin ku tenzîmkirina vê berhemê û binavkirina sernivîs û beşên wê aîdê weşanxanê ye, di Kulliyata Rîsaleyên Nûr de hemî sernav cih nagirin.

***

   Heta niha Rîsaleyên Nûr bi gellek zimanên dinyayê hatiye wergerandin. Mixabin ji ber qedexe û zexta li ser zimanê Kurdî, pêşî Rîsaleyên Nûr bi zimanên biyanî hatiye wergerandin û wergera Kurdî ku zimanê dayikê yê Bedîuzzeman bi xwe ye û wî bi xwe jî gotarên xwe bi wî zimanî weşandine, dereng ketiye. Weşanxaneya Zehrayê bi wergerandina Rîsaleyên Nûr li zimanê Kurdî valahiyeke girîng ya di vî warî de dadigire.

   Di vê wergerê de heta ku ji dest hatiye hevokên dirêj hatine kinkirin û zimanekî sade hatiye tercîhkirin da ku fêhmkirina wê hêsan bibe. Lewra kîtabên Rîsaleyên Nûr hemî jî di civat û suhbetan de, û ji bo xas û amê bi dersînî têne xwendin. Ji ber vê, divê ji berhemeke edebî pirtir bi çavê kîtabeke ilmî lê bête mêzekirin.