Destûra Sisêyan: Divê hûn bizanibin ku hemî hêza we di îxlas û heqiyê de ye. Belê, hêz di heqî û îxlasê de ye. Kesên neheq jî di neheqiya xwe de, ji ber îxlas û semimiyetê hêzê bi dest dixin. Ev xizmeta me jî delîl e ku hêz di heqî û îxlasê de ye. Parçeyek îxlasa di vê xizmeta me de jî, rastiya vê dozê îsbat dike û ew bi xwe ji xwe re dibe delîl.

   Hûn dizanin ku Hz. Elî (r.e.) bi wan kerametên weke mu‘cîzeyan û Hz. Xewsê E‘zem (q.s.) jî bi kerametên xeybî ji bo van hikmetên îxlasê, îltifatê ji we re dikin, teselliyê didin we û manen ji we re li çepikan dixin. Belê, qet nekevin gumanê. Ev xweşgotinî û lixweşçûnên han ji bo îxlasa we ne. Eger hûn bi zanîn vê îxlasê bişkînin, hûnê şeqama wan bixwin. Şeqamên şefqetê yên di Lem’eya Dehan de bînin bîra xwe. Eger hûn dixwazin qehremanên weha li pişta xwe weke zahîr û li pêşiya xwe jî weke seyda bibînin divê hûn li gorî hikmeta  

وَيُؤْثِرُونَ عَلٰٓى اَنْفُسِهِمْ

   îxlasa tam bi dest bixin. Di şerefê de, di meqam û elaqedariyê de, hetta di tiştên weke menfaeta maddî de jî ku li xweşa nefsê diçin, birayên xwe tercîhî xwe bikin. Hetta gotina rastiyeke îmanê ya pir xweşik û nazik ji bawermendekî muhtac re menfaeta herî bêguneh û bêzirar e. Lê eger mumkin be ji bo ku hûn nebin xemxwerê xwe tenê, wê we‘zê bi yekî ku hûn naxwazin bidin kirin û bila ev li xweşa we jî biçe. Eger arzûyeke we hebe û hûn bibêjin, “Ez vê mijarê bibêjim, ji bo ku xêrê bi dest bixim.” çendîn ku ne guneh e jî, lê belkî zirarê bide îxlasa navbera we.

   (Lem’alar: 236)

***

      Destûra Çaran: Taybetmendî û çêyiyên birayên xwe di xwe de tesewwur bikin û bi şeref û rûmeta wan îftîxar bikin.