Pêşgotin

   Nivîskarê Kulliyata Rîsaleyên Nûr Bedîuzzeman Seîd Nûrsî di temamê jiyana xwe de ji bo rastiyên îmanê xebitiye. Xwestiye bi şîroveyeke nû û bi awayekî cihê heqîqetên îmanê nîşan bide. Wî li hember Rojavaya ku di warên çandî û leşkerî de li pêş bû, ji rastiyên Qur’an û Sunnetê hêza manewî ya alema Îslamê derxistiye pêş û bi Kulliyata Rîsaleyên Nûr ekoleke nûjen çêkiriye.

   Li gorî Bedîuzzeman ji bo avakirina civata Îslamê ya nûjen xerca herî girîng heqîqetên îmanê ne. Bedîuzzeman xwestiye ku bi wê xercê keleha Îslamê ya ku li ber hilweşandinê bû ava bike.

   Ev vexwênerê dikana mucewherên Qur’anê weke zêrkerekî bi awayekî pir hessas xebitiye û şîroveyeke nûjen ya Qur’an û Sunnetê, mîna ava heyatê pêşkêşî mirovên vê sedsalê kiriye ku di nav teferruatan de xeniqîbûn û ji teqûreqa dinyayê êdî bêzar mabûn.

   Kesên ku ji vê kaniya iksîrê vexwarine, careke din di bin siya Qur’an û Sunnetê de dest bi jiyaneke nû kirine. Rûhên li ber mirinê, dilên ku bi gunehan reş bûbûn û hestên ku ji ber bêhêvîbûnê ezab dikişandin, bi hingaftineke mesîh-mîsal careke din vedijîn û sax dibûn. Mirov dikare bibêje; kesên ku Rîsaleyên Nûr dixwînin û tê digihin, veguherîneke mîna saxbûna piştî mirinê bi wan re çêdibe.

   Mîna her sedsalê pirsgirêkên taybet yên vê sedsalê jî hene. Dema mirov li rewşa alema Îslamê ya dîrokî mêze bike, wê xweya bike ku di her fetretekê de muceddid/nûker, murşid û alimên mezin derketine ku ji dermanxaneya Qur’an û Sunnetê derman ji nexweşînên manewî yên wê demê re pêşkêş kirine. Çi dema ku ummeta Îslamê ketiye tengasiyekê, ev lehengên sitêrmîsal yên alema manewî mîna meşaleyekê tarîya bêdîniyê û bid‘etan bela kirine. Ew ewrên tarî ku diketin ber rastiyê û guman ji xelkê re çêdikirin rakirine, roja rastiyê nîşanî mirovan dane û careke din ummet ji tengasiyê xilas kirine; xweşî, rihetî û bextewarî bexşî wan kirine.