C. METODA PERWERDEYÊ

   1. Projeya Medresetu’z-Zehrayê

   Medresetu’z-Zehra çi ye?

   Bernameya wê çi ye, Pergala wê Çawa ye?

   Ev medrese, wê bi fêkiyê ku belav bike û bi nûra ku bide herkesî xizmeta Îslamê bike. Ev medrese wê li cem aqil dibistaneke bala; li cem dil medreseyeke bêqusûr û di çavê wijdanê de jî zawiyeyeke herî pîroz temsîl bike. Çawa ku wê medrese be, wê wisa mekteb û dibistan û herwisa tekke be jî.

(İçtimaî Dersler, Münazarat: 143)

***

   Ya Pêşîn: Ji ber ku îtibara medresê heye, Medresetu’z-Zehra rastiyeke mezin di xwe de digire; navdar e, tê naskirin, xelk hînî wê bûye, şewq û cazîbeya wê heye. Loma jî ew mubarek bi navê “medrese”yê navkirî ye û xwediyê van taybetmendiyan e.

   Ya Duduyan: Ev medrese wê zanistên nû û ilmên medresê bixe nav hev û bi hev re bide xwendin. Zimanê Erebî wacib, Kurdî caiz, Tirkî jî lazim e.

   Pirs: Di vê harmonîkirina ilmê medresê û zanistên din de çi hikmet heye ku tu ewqas terefdarê wê yî û hertim qala wê dikî?

   Bersiv: Ji bo ku mirov muhakemekirina zihnî ji wê tarîya sefseteya ku ji çar qiyasên fasid çêdibe rizgar bike. Hem jî ji bo demagojojiya ku ji hêla qabiliyeta fikirînê ya fîlozofane ve weke zarokan tê teqlîdkirin rabike.

   Pirs: Weke çi?

   Bersiv: Roniya wijdanê, ilmên dînî ne. Nûra aqil, zanistên medenî ne. Bi harmonîkirina herduyan rastî derdikeve holê. Bi wan herdu baskan himmeta şagirtan difire. Dema ku ev herdu ji hev biqetin, di ya pêşîn de teassub, di ya duduyan de jî hîle û şubhe çêdibin.