10- Her çiqas xîtab û bang e ji însanên ku li hemû dem û deveran hatine, çûne re; lê ji ber hêsanî û herikîna beyanê, her wekî ku muxatab yek e.
11- Tekrarên wê, ji bo bidestxistina xayeyên îrşadê, takrîr û tehqîqê, yanî bicîkirin û lêkolînê îfade dikin. Her wuha, tekrarên wê, bêzirar in. Dubareyên wê, tam û lezzeta wê, narevîne. Her ku ducare dibe, wek mîsk û enberê bêhn dide.
12- Quran, ji bo qelban, quwet û xida ye. Ji ruhan re, şîfa ye. Tekrara xida, quwetê zêde dike. Ji ber ku bi tekrarê, nêzîktir û nastir dibe, lezzeta wê jî zêde dibe.
13- Însan di heyata xwe ya maddî de, her dem muhtacê hewayê ye; her wext, yê avê; her zeman û her roj, hewcedarê xwarin û xidayê ye; her hefte, yê tavê ye. Tekrara van esasan, ne tekrar e. Ji ber tekrara îhtiyacê ye. Her wuha, însan, di hêla heyata ruhî ya xwe de, muhtacê hemû wan cûre û new’an e ku di Quranê de derbas bûne. Hewcedariya bi hin new’an, her dem û gav e. Mînak: Huwellah. Lewra, ruh, bi vê ya, nefesê digre. Ji bo hinek new’an, her wext; ji hinekan re her zeman, muhtac in. Va ye, ji ber hewcedariya heyata qelbî; Quran, tekraran dike. Mesela, Bismîllah ji ber ku wek hêwaya nesîmî û nerm, qelb û ruh tatmîn dike; ji ber îhtiyaca pir, di Quranê de, pir hatiye tekrar kirin.
14- Tekrara hin hedîseyên cuzî yên wek qisseya Mûsa, îşaret e ku ew hedîse, dustûreke mezin, dihundirîne, îhtiwa dike.
Xulase: Quran, him zikr e, him fikr e, him hîkmet e, him ilm e, him heqîqet e, him şerîet e, him şîfa qelban e û hîdayeta mumînan e û rehmet e.
Î’lem eyyuhel ezîz! Fitreta însan, halekî wî yê xerîb heye ku di dema xefletê de, hukmên latîfe û hawwasan, tevlihev dike û dişibihîne hev û ji hev dernaxe. Mesela, dîn û mecnûnekî ku dest û çevan dişibihîne hev û nikare xizmet û wezîfê wan ji hev derxe, tiştekî ku li jorê bi çavê xwe dibîne, destê xwe dirêj dikê ku hilde. Ji bo ku dest û çav cînarên hev in, zen dike ku karê çav bike, dest jî dike. Her wuha, însanê xafil, digel ku ewqas aciz e û nikare tiştekî aîdîê xwe yê piçûk bide hev û têkûz bike, bi qurretî û bi xeyala xwe û bi zorbetî dest dirêjî fîîlên Xweda Teala dike.