Pirsa gumreş ya sisêyan: Ehlê dinya weha dibêjin: “Gelo tu ji me hez dikî? Tu me diecibînî? Eger tu me biecibînî, nexwe çima tu ji me dixeyidî û nakevî nav me de? Eger tu me neecibînî, nexwe tu dijber î; em ê dijberan biperçiqînin.”
Bersiv: Min neku ji we, teqez min ji dinyaya hewe hez kirîba min xwe ji dinyayê nedida alî. Ez ne hewe ne jî dinyaya hewe diecibînim; lê ez tevlî nabim. Lewra mebesta min tiştekî din e. Hinek mijarên dî dilê min tije kirine; cih nehiştiye bo hizirandina tiştên dî. Erka hewe ew e ku hûn li destî binêrin, neku hûn li dilî binêrin. Lewra hûn pergala xwe, ewleyiya xwe dixwazin. Piştî ku dest tevlî nebe, çi mafê hewe heye ku hûn bibêjin “bila dil jî ji me hez bike” û hûn bi xwe jî qet ne layiqin. Eger hûn tevlî dil bibin... Belê wek çawa di nava vê zivistanê de ez biharê dixwazim; lê ez îrade nakim û ji bo anîna wê ez nikarim hewl bidim. Eynen welê, ez dixwazim rewşa alemê baş bibe, ez dua dikim û başbûna ehlê dinyayê dixwazim, lê ez nikarim îrade bikim; lewra ji destê min nayê. Ez nikarim bi kiryarî (fîîlî) hewl bidim. Lewra ne erka min e, ne jî hêza min heye.
Pirsa çarê ya biguman: Ehlê dinya dibêjin: Me hinde bela dîtine ku êdî ewleyiya me bi ti kesî nemaye. Em ê çawa ewleyiyê bi te bînin ku dema fersend têkeve destê te tu li gorî daxwaza xwe têkilî me nabî?
Bersiv: Mijarên pêşî ewleyiyê dide we; digel wê çendê di war û welatê xwe de, di nav xwendekar û xizmên xwe de, di nav yên li min guhdarî dikirin de, di nav bûyerên bikelecan de ez têkilî dinyaya hewe nebûbim; ez li diyarê biyanî, tenê, bi serê xwe, biyanî, zeîf, bêhêz, bi hemû hêza xwe ve xwe dayî axretê, têkiliya wî ya bi mirovan re hatî qutkirin, bi boneya îman û axretê ji dûr ve hin dostên wî yên ehlê axretê heyî, ji bilî wan ji her kesî re biyanî û her kes bi çavê biyanîtiyê lê dinêre.. (belê ez di rewşeke holê de me) mirovekî holê têkilî dinyaya we ya bêfeyde û bixetere bibe… ne yê qat qat dîn be vê nake.
MIJARA PÊNCAN
Der barê pênc gelşeyan de ye
Ya yekê: Ehlê dinyayê ji min re holê dibêjin: Çima tu prensîbên şaristaniya me, awayê jiyana me, şiklê kincên me li ser xwe tetbîq nakî? Nexwe tu dijberê me yî?
